فەرماندەکێ پێشمەرگەی: شیعە دێ سونان ل مووسلێ قڕکەن
ئه‌ڤرۆ نيوز:
حەیدەر عەبادی سەرۆک وەزیرێن عیراقێ و فەرماندێ گشتیێ ھێزێن چەکدار دداخۆیانیەکێ دا پشتڕاستکر کو دێ میلیشیاتێن شیعی پشکداریێ د ئازادکرنا دەڤەرێن پارێزگەھا نەینەوا دا کەن ودیارکر” گەلەک لایەنان ئەڤ چەندە پێنەخوەشە، بەلێ دێ حەشد شەعبی پشکداریێ د ئوپەڕاسیۆنا ئازادکرنا باژێڕێ مووسلێ و دەڤەرێن پارێزگەھا نەینەوا دا کەن، فەرماندەکێ پێشمەرگەی ژی رادگەھینیت، ھەکە حەشد شەعبی بھێتە مووسلێ، دێ کارەسات پەیدابن و کوشتارێن مەزن دێ ھێنە ئەنجامدان.
عەمید مەغدید ھەرکی، فەرماندێ پێشمەرگەی ل فەرماندەیا زێرەڤانی بۆ رۆژناما ئەڤرۆ گۆت” پرسا پشکداریکرنا میلیشیێن شیعی ئێکە ژ پرسێن گرنگ، ژ بەر کو د عیراقێ دا ئاریشا د ناڤبەرا عەرەبێن شیعە و سونە دا یا گەھشتیە گۆپیتکێ، ھەکە حەشد شەعبی یان ھێزەکا دی یا شیعی پشکداریێ د ئوپەڕاسیۆنا رزگارکرنا مووسلێ دا کەت، دێ تولا خوە ل سونان ڤەکەن، ھەکە میلیشیێن شیعی ھاتنە مووسلێ و سونە قڕکرن، وی دەمی چو جوداھی ل گەل داعشێ ھەیە؟، ھەر وەکی داعشێ شیعە قڕکرین ، ھاتنا داعشێ بۆ مووسلێ و رومادی چەند یا خراب بوو و چەندین کوشتارگەە دانان و خەلک ب دارڤەکرن، ھەکە میلیشیێن شیعی بھێن دێ خرابتر کەن، چونکی دێ تولا خوە ڤەکەن، ھەر کەسەک نەک تنێ شیعە ھزر د تۆلڤەکرنێ دا بکەن تشتەکێ خرابە، ب دیتنا من ھەکە سونێن دەوروبەرێ مووسلێ و عەشیرەتێن مووسل ھەڤکاریا حوکمەتا عیراقێ بکەن بۆ رزگارکرنا وی باژێری گەلەک باشترە ژ وێ چەندێ کو ھێزەکا دی وەکی میلیشیێن شیعی بھێنە مووسلێ، ب چو شێوەکی باش نینە حەشد شەعبی بھێتە دناڤ مووسلێ دا و پشکداریێ د رزگارکرنا وی باژێری دا بکەت”.
سەعید مەمۆزینی، بەرپرسێ راگەھاندنا لقێ ١٤ یێ پارتی دیموکراتی کوردستان ل دۆر پشکداریا حەشد شەعبی د رزگارکرنا مووسلێ دا بۆ رۆژناما ئەڤرۆ دیارکر” پێدڤیە ھەماھەنگی د ناڤبەرا ھەموو لایەنان دا ھەبیت بۆ رزگارکرنا مووسلێ ژ بەر کو پرۆسەکا گرنک و ھەستیارە، دڤێت ھێزێن ئەمریکا و پێشمەرگە و لەشکرێ عیراقێ پشکداربن، ھەکە میلیشیێن شیعی پشکدار ژی ببن، دڤێت ل دەرڤەی باژێڕێ بن، چونکی ھەستیاری د ناڤبەرا شیعە و سونان دا پەیدابوویە و ھاتنا حەشد شەعبی بۆ مووسلێ کارەکێ باش نینە و دێ خەلکی کوژن و خەلکێ مووسلێ ب خوەژی رازی نابن شیعە بھێنە باژێرێ وان”.
