فەرمانگەها میدیا و زانیاری: 276 پڕۆژە ل زاخۆ هاتینە بجهئینان
زاخۆ، دلۆڤان هالۆ:
فەرمانگەها میدیا و زانیاری یا سەر ب حوكمەتا هەرێما كوردستانێ ڤە د ڕاپۆرتەكێ دا بەلاڤكریە، كو بڕیارا ئیدارەبوونا سەربخوە یا زاخۆ، ئێك ژ بڕیارێن گرنگ یێن كابینەیا نەهێ یا حوكمەتا هەرێما كوردستانێ بوو، دەمێ زاخۆ بوویە ئیدارەیا سەربخوە و هەتا نوكە، چەندین پڕۆژە و خزمەتگوزاریێن مەزن هاتینە بجهئینان، سەرجەمێ وان پڕۆژەیان دبنە ٢٨٦ پڕۆژە، ژ وان ژی ٢١٨ پڕۆژە ب دووماهی هاتینە و ٦٨ پڕۆژە ژی هێشتا د وارێ بجهئینانێ دانە.
فەرمانگەهێ ئاماژە ب وێ چەندێ ژی كریە كو بەلاڤكرنا پڕۆژەیان ل سەر كەرتێن جودا ب ڤی شێوەی بوویە: كەرتێ باژێڕڤانیێ وەكو ڕێك و پر ٩ پڕۆژە، كەرتێ پەروەردە و خواندنا بلند ١٧ پڕۆژە، كەرتێ ئاڤێ وەكو ئاڤا بن ئەرد و چاندن ٤٥ پڕۆژە، دیسا كەرتێ ساخلەمیێ ٢٠ پڕۆژە و كەرتێ كارەبێ ٣٣ پڕۆژە و كەرتێ گەشتوگوزارێ و شوونواران ١٦ پڕۆژە و كەرتێ فەرمانگەهێن حوكمەتێ و ئەوقاف ٥٤ پڕۆژە.
ئاشكرا ژی كریە، د دەمێ پێنج سالێن كاركرنا كابینەیا نەهێ یا حوكمەتا هەرێما كوردستانێ دا ل ئیدارەیا سەربخوە یا زاخۆ، حەفت ڕێڤەبەریێن نوو یێن گشتی هاتینە ڤەكرن و ١٧ بنگەهـ و نڤیسینگەهـ و پشك بووینە ڕێڤەبەری، دیسا ١٦ ڕێڤەبەری هاتینە ڤەكرن، كو پێشتر نەبوون، دیسا ب ڕێژەیا 81%ێ جاددە و كۆلانێن زاخۆ هاتینە قیركرن، گرنگترین ئەو پڕۆژەیێن ستڕاتیژی یێن زاخۆ، كو ل پاشەڕۆژەكا نێزیك بهێنە بجهئینان، دروستكرنا جاددەیا ٦٠ مەتری و دەڤەرا پیشەسازی و بەنداڤە و دێ مفایەكێ زۆر بۆ خەلكێ دەڤەرێ هەبیت.
