فەرنسا یاداشتەك بۆ نووژەنكرنا شەش جهێن شوونواری ل ئامێدیێ ئیمزا كر
ئامێدیێ، مەحمود نهێلی:
ب بەرهەڤبوونا وارشین سەلمان، دەڤەردارێ ئامێدیێ و یان برایم قونسلێ گشتی یێ فرەنسا ل هەرێما كوردستانێ، یاداشتەك بۆ نووژەنكرنا شەش جهێن شوونواری ل دەڤەرا ئامێدیێ هاتە ئیمزا كرن.
وارشین سەلمان، دەڤــەردارێ ئامێدیێ بۆ رۆژناما ئەڤرۆ دیار كر، ب بەرهەڤبوونا كەیفی مستەفا، رێڤەبــەرێ گشتی یێ شوونوارێن هەرێما كوردستانێ و دكتۆر بێكەس جەمال بریفكانی، رێڤەبــەرێ شوونوارێن پارێزگەها دهۆكێ و رێڤەبەرێن دام و دەزگەهێن میری پێشوازی ل یان برایم قونسلێ گشتی یێ كۆمارا فرەنسا ل هەرێما كوردستانێ و شاندێ د گەل دا هاتە كرن و گۆت: «ل هۆلا سمیناران مە كۆمبوونەك ل سەر نووژەنكرنا هندەك جهێن شوونواری ل دەڤەرا ئامێدیێ كر، كو پێكهاتینە ژ: زانینگەها قوبەهان، منارا ئامێدیێ، گۆرستانا میرا، كنیشتا جوهیان، كەنیسا كلدانیا و كۆرا سێریجێ».
دەڤەردارێ ئامێدیێ سوپاسیا پشتەڤانیا بەردەواما گەل و حوكمەتا فرەنسا كر، بو وێ گرنگیدانا ئەو ددەنە دەڤەرا ئامێدیێ، ب تایبەت گرنگیدانا وان بۆ جهێن شوونواری و هیڤی خواست، كو ئەڤ رەنگە هاریكاریە د بەردەوامبن.
هەر كۆمبوونێ دا قونسلێ گشتی یێ فرەنسا پەیڤەك پێشكێش كر و تێدا بەحسێ نووژەنكرنا شەش جهێن شوونواری یێن ئامێدیێ كر و پاشی یاداشتا نووژەنكرنا ڤان جهێن شوونواری ژ لایێ دەزگەهێ ئەلیف یێ فرەنسی و شوونوارێن كوردستانێ ڤە هاتە ئیمزاكرن، كو ب گوژمێ ملیۆنەك و 400 هزار یۆرویان ژ لایێ ڤی دەزگەهی ڤە دێ هێنە نووژەنكرن.
