فەرید و موراد پشكەك بوون ئیراقێ بگەهیننە قارەمانیا ئاسیا
ئەڤرۆ
قەیس وەیس:
هەردو یاریزانێن پارێزگەها دهۆكێ و ئیدارا سەربەخوەیا زاخۆ فەرید رەعدی و موراد عەلی شیان ل گەل هەلبژارتیێ ئیراقێ بۆ یاریا باسكێت بۆلێ تیما خوە ب گەهینە ڤاڤارتنێن دووماهیێ یا قارەمانیا ئاسیا ئەوا هەڤڕكیێن وێ ل وەلاتێ قەتەر ب پشكداریا شەش هەلبژارتیێن عەرەبی ژ كۆما چارێ دهاتنە كرن.
هەلبژارتیێ ئیراقێ شیا رێزا ئێكێ بهێت، قەتەر، فلەستین، ئیمارات، كوێت و عومان رێزێن دویێ هەتا شەشێ بهێن و دەربازبوو قۆناغا دووماهیێ و هیڤیێن خوە گەشترلێكرن بۆ دووماهیا قارەمانیێ ئەوا بڕیارە هەڤڕكیێن وێ ل 2025 وەلاتێ چینێ مێڤانداریا وێ بكەت.
فەرید رەعدی یاریزانێ پارێزگەهێ و یانەیا نەفت و موراد عەلی یاریزانێ یانەیا زاخۆ و ئیدارا سەربەخوە یا زاخۆ شیان د یاریێن ڤاڤارتنان دا باشترین ئاست نیشان بدەن ئەوا د داخویانیەكێ دا محەمەد نەجار راهێنەرێ هەلبژارتیێ ئیراقێ پەسنا هەردو یاریزانان كری وەكو یێن كاریگەر د ناڤ یاریگەهێ دا و ئەو دەمێ پێدڤی د زانین چەوا سەرەدەریا یاریێ بكەن.
ژلایێ خوەڤە یاریزان فەرید رەعدی گۆت: پێخوەشحالین ل گەل هەڤالێن خوە تایبەت موراد عەلی كو ئەم شیاین وەكو یاریزانێن كورد ببینە جهێ رازیبوونا كادرێ راهێنانێ و ئاستەكێ بەرچاڤ نیشان بدەین، كاروانێ مە بۆ دەربازبوون بەر ب دووماهیا قارەمانیا ئاسیا یا درێژە و رژدین ئاست و شیانێن خوە زێدەتر باشتر بیت.
