فەستیڤالا بەرهەمێن خۆمالی ل بەرواری بالا ڤەژاندنەكا ئابووری ئێخستە دەڤەرێ
ئامێدیێ، مەحمود نهێلی:
د فەستیڤالا سێیێ یا بەرهەمێن خۆمالی دا ل بەرواری بالا ل سنۆرێ ناوچەدارییا كانی ماسێ، كو تێدا هەژمارەكا زۆرا بەرهەمێن خۆمالی و برگەیێن هونەری و فولكلۆری هاتبوونە نیشادان ڤەژاندنەكا ئابووری ژی دایە وێ دەڤەرێ.
ل دووڤ ئاخڤتنا بۆردێ سەرپەرشتیا فەستیڤالێ، د پێنج رۆژێن فەستیڤالێ دا پتر ژ 150 هزار كەسان قەستا ناڤ فەستیڤالێ كربوو، دۆرێن 35 تەنێن سێڤان و نێزیكی 10 تەنێن هناران هاتینە فرۆتن، دیسا ب بهایێ 200 ملیۆن دیناران خوارن هاتیە فرۆتن.
فەستیڤالا بەرهەمێن خۆمالی بۆ سالا سێی یە ل سەر ئێك ل بەرواری بالا برێڤە دچیت، سازكرنا ڤێ فەستیڤالێ ژی هاندان و پشتەڤانیەكە بۆ جۆتیارێن دەڤەرێ، ژ بۆ ساخكرنا بەرهەمێن خۆمالی و سالانە ژی هەژمارا سەرەدانیكەرێن فەستیڤالێ زێدەتر لێ دهێتن و ناڤودەنگیا فەستیڤالا بەرواری بالا سەرنجا هەموو خەلكێ كوردستانێ راكێشایە.
بۆ ئەڤ سالە بەرهەمێن خۆمالی یێن هەر چار پارچێن كوردستانێ پشكداری تێدا كربوو، ب هزارەها كیلۆیێن سپیاتی و بەرهەمێن چاندنێ هاتنە فرۆتن، ژبلی نیشادانا هونەر و فولكلۆرێ دەڤەرێ د وێ فەستیڤالێ دا.
