فەستیڤالا دهۆكێ بوویە سیمبۆلا ئێكگرتنا كوردان
زنار تۆڤی:
ئازادە جەماعەتی، ئەكتەرەكا رۆژهەلاتێ كوردستانێ یە، خەلكا باژێرێ سنەیە، ئەڤە چار سالن وەك ئەكتەر كار دكەت، د دیدارەكێ دا بۆ رۆژناما ئەڤرۆ گۆت: هەتا نوكە من پشكداری د چار كورتە فلمان و فلمەكێ درێژ یێ سینەمایی دا كریە، هەروەسا وەكو ئەكتەر پشكداری د فلمێ ( بەیان) دا كریە، كو ئەو فلمە یێ پشكداربوو د فلمە فیستەڤالا دهۆكێ دا و هەتا نوكە دو جاران من پشكداری د فلمە فیستیڤالا دهۆكێ دا كریەو ڤێ فەسیتەڤالێ گرنگیا خۆ هەیە بۆ هەر چار پارچێن كوردستانێ بوویە سیمبۆلا ئێكگرتنا كوردان، چونكی فەستیڤال كارێ كلتۆری و هونەری و سینەمایی دكەت.
ناڤهاتیێ گۆت: ژبلی كارێ ئەكتەرییێ ئەز چالاكڤانا مافێ ژنانم و ژینگە هپارێزییە ل باژێرێ سنە و گەلەك بەرگرییێ ژ مافێ ژنان دكەم ل رۆژهەلاتێ كوردستانێ، هەروەسا ئەڤ سالە مژارا زمانی دناڤا فلمە فەستیڤالا دهۆكێ دا گەلەك گرنگیا خۆ هەبوو، نوكە گەلەك ژ كوردان زمانێ خۆ ژبیركریە و نەشێن ب زمانێ كوردی باخڤن و ئەڤە برینەكا كوورە د دلێ من دا، هەروەسا دەمێ ئەم زمانێ خۆ ژ دەست ددەین، ئەڤە وێ چەندێ دگەهینیت، كو رهێن مە هشك ببن، وەكو دارەكێ دەمێ رهێن وێ هشك ببن، ئەو دار ژی دێ هشك بیت، لەوما یا گرنگە ئەم خۆ ل زمانێ خۆ بكەینە خودان، چونكی زمانێ مە ناسناما مەیە و د بیاڤێ هونەری دا هێشتا هندەك پرسگرێك ل پێشیا ژنین كورد هەنە، بەلێ ل دەڤەرا رۆژهەلاتا ناڤین رەوشا ژنێن كورد ژ رەوشا هەموو ژنێن گەلێن دیتر باشترە، دیسان فلمە فەستیڤالا دهۆكێ ژی دشێت دەنگێ ژنان بلند بكەت و بگەهینیتە هەموو دەڤەرێن جیهانێ، هەروەسا فلمە فیستەڤالا دهۆكێ ژ هەموو روویانڤە یا سەركەفتی بوو.
