فەستیڤالا دویێ یا جلكێن كوردی ل زاخۆ دێ هێتە گێڕان
دلۆڤان هالۆ:
بریارە ل نافەراستا ڤێ هەیڤێ، فەستیڤالا دویێ یا جلكێن كوردی ل باژێرێ زاخۆ بهێتە گێڕان و بۆ دەمێ دو رۆژان دێ یا بەردەوام بیت.
دلخاز موسا، رێڤەبەرێ رەوشەنبیری و هونەری ل ئیدارەیا سەربەخۆیا زاخۆ، ل دۆر ئامادەكاریێن وێ فەستیڤالێ بۆ رۆژناما ئەڤرۆ گۆت: فەستیڤال دێ ل رۆژێن پازدە و شازدەی ڤێ هەیڤێ دێ ل بن درۆشمێ (وەلات دایكە، كلتۆر ناسنەمەیە) ل هەمبێزا پرا دەلال دێ هێتە گێڕان و ئامادەكاریێن باش بۆ هاتینەكرن، هەروەسا بەرنامەیەكێ باش ژی بۆ هاتیە دارشتن كو ژ چەند بڕگەیان پێك دهێت، ژوانا نیشادانا چەندین جۆرێن شەلوشەپكان و خاكان و كراس و فیستانێن كوردی، هەروەسا چەندین تیپێن هونەرێ مللی و گرۆپێن دەنگبێژان كو ژ هەر چار پارچەیێن كوردستانێ نە، دێ تێدا پشكداربن، بۆ زانین ل هەردو رۆژێن فەستیڤالێ ل دانێ سپێدێ دێ بڕگە و پەنەلێن زاستی ل دۆر شێواز و مێژۆیا جلكێن كوردی ب پشكداریا ماموستایێن زانكۆیێ دێ هێنە پێشكێشكرن، هەروەسا نێزیكی بیست دكانان دێ هێتە چێكرن كو جلكێن كوردی دێ هێنە نیشادان و ل رۆژا دویێ دێ كۆنسێرتەكا هونەری هێتە گێڕان.
