فەستیڤالا لالش هاتە گێڕان و (بابا چاویش) هاتە خەلاتكرن
لەزگین جۆقی:
ب پشتەڤانیا بەرێز(مەسرور بارزانی) سەرۆكێ حكومەتا هەرێما كوردستانێ، دوهی 15/2/2025 فەستیڤالا بنگەهێ لالش ل بن دروشمێ (كلتۆرێ مە سەرەكانیا رەسەنایەتیا مە یە) ل هولا كۆنفرانسان ل سەرۆكاتیا زانكۆیا دهۆك هاتە گێڕان و خەلاتێ ئەڤە سالە پێشكێشی (بابا چاویش) هاتە كرن.
د. فارس كتی، بەرپرسێ پشكا پەیوەندیان ل بنگەهێ لالش بۆ رۆژنامەیا ئەڤرۆ گۆت: فەستیڤالا ئەڤ سالە گرنگیا خوە هەیە و یا جودایە ژ سالێن بۆری، چنكو پەنەلێن تایبەت و جیاواز ب خوە ڤە دگریت، كو دەربڕینێ ژ فولكلۆرێ باب و باپیران دكەن، چنكو بنگەهێ لالش ل سەر پاراستنا فۆلكۆر و كلتۆرێ رەسەنێ ئیزدیان كاردكەت،
سەعید جردۆ، سەرۆكێ دەستەیا بلند یا بنگەهێ لالش گۆت: فەستیڤالا ئەڤ سالە ب پشتەڤانیا سەرۆكێ حكومەتا هەرێما كوردستانێ دهێتە گێڕان، چنكو حكومەتا هەرێما كوردستانێ گەلەك پشتەڤانیا ئیزدیان دكەت و چەندین پرۆژە بۆ ئێزدیان ئەنجامداینە، ژوانا مینحەیا درایی بۆ ئێزدی یێن رزگاربوویێن دەستێ داعش كو (3575) كەس ژێ مفادار بووینە، و سەنتەرێ پشتەڤانیا جڤاكی و چارەسەریا دەروونی و هەموو جۆرە ئاسانكاری بۆ رزگاربوویێن ئێزدی كو بچن بەردەوامیێ ب خواندنا خوە بدەن، هەروەسا سالانە بنگەهێ لالش خەلەتەكێ پێشكێشی كەسایەتیەكی دكەت كو گەلەك خزمەتا ئێزدیان و جڤاكی دكەت و بۆ ئەڤ سالە (بابا چاویش) هاتە خەلاتكرن، چنكو ڤی كەسی گەلەك خزمەتا لالشا نورانی كریە.
