فەلسەفەیا ئاخێ
سەیفوللا محەمەد
ئاخ.. هەی ئاخ
تە چەند..
ژ دەستێن خیانەتێ
تام كر تاما تەحلاتییێ
تە چەند خوە گرت
ل بەر دەربێن خوەفروشییێ
چەند دنالی
ژ بەر دەردێن دێرینێن
بێ تفاقییێ
هێشتا هێشتا برین كووری و
ژئازارا ڤێ برینێ
نالینێن تە گەهشتینە
هەمی قۆناغ و دویراتییێ
لێ تو دایكی.. تو وەلاتی
هەی ئاخ و ئاخ
سینگێ تە یێ پان و بەرین
دلێ تە یێ پڕ حەز و ڤین
بێ كەرب و كین
ئازا كرن..
تەڤ خوەفروش و
خیانەتكارێن تە و
كوردینییێ
دەمێ مرنا وان ژی
جەستەیێن وان
لبەر سینگێ خوە هەمبێز دكی
لبەر خوە دكی..
كراسێ ڕەشێ
شینی و بەهییێ
ئاخ و هەی ئاخ.
