فەیسبۆك و ئیسنتگرامێن ب پارە بۆ وەلاتێن ئێكەتیا ئورۆپی كەفتنە كاری
كۆمپانیا مێتا راگەهاند؛ پشكداریا هەیڤانە یا ب بەرامبەر پارەیی بۆ فەیسبوك و ئینستگرامی ل ئورۆپا هاتە بەردەستكرن كو تێدا بكارئینەر ریكلامان د وان تۆڕان دا نابینن.
ئەڤ چەندە پشتی ئاریشەیێن مێتایێ ل گەل وەلاتێن ئێكەتیا ئورۆپی هات كو وان وەلاتان داخواز ژ مێتایێ كربوو زانیاریێن بكارئینەران ل دەف خۆ هەلنەگریت، مێتایێ ژی دیاركربوو كو ئەو زانیاریێن بكارئینەران بكاردئینیت دا كو ریكلامێن نێزیك ژ بۆ وان دیارببن، لێ ئێكەتیا ئورۆپی ئەڤ چەندە ب بنپێكرنا تایبەتمەندیا بكارئینەران ل قەلەم دایە.
مێتا راگەهاند كو پشكداریا ب پارە ل ئورۆپا هاتە بەردەستكرن و تێدا بهایێ پشكداریا هەیڤانە بۆ فەیسبووكی و ئینستاگرامی 9.99 دۆلارن ل سەر وێبی، هەروەسا 12.99 دۆلارن هەیڤانە بۆ ئامیرەیێن ئەندرۆید و IOS.
پشكداریا ب پارە، ئانكۆ مێتا داتایێن بكارئینەران ل دەف خوە هەلناگریت و ریكلام بۆ بكارئینەران د وان تۆڕان دا دیار نابن.
