قائیمقامێ دهۆكێ: ب هووری دووڤچوونا بازاڕی ل هەیڤا رەمەزانێ دهێتە كرن
دیدار، دلۆڤان ئاكرەیی
قائیمقامێ قەزا دهۆكێ راگەهاند، د ڤێ هەیڤا رەمەزانێ دا دووڤچوونەكا هوور ژلایێ لژنا چاڤدێریێ ڤە ل سەر بازاری دهێتە كرن و بهایێن هەمی جهێن بازرگانی هاتینە كۆنترۆلكرن و گەلەك داشكاندن ل سەر جهێن ساخلەمیێ و تاقیگەهان و بازار و ماركێتێن مەزن هاتینە دانان.
ئیسماعیل مەحەمەد قایمقامێ قەزا دهۆكێ دیار كر، دووڤچوونەكا هوور بۆ كەڕەستەیێن خوارنێ و ڤەخوارنێ و شریناهێیان دهێتە كرن و پێدڤییە گرنگیەكا تەمام ب كۆالیتێیا جوریڤە ب كەرەستەیان بهێتە دان و ژلایێ نرخێن وان ڤە دگونجابن و گۆت: هەر ب هەلكەڤتا هەیڤا رەمەزانا پیرۆز رێڤەبەریا گەشت و گوزارا دهۆكێ بازارێ شەڤێن رەمەزانێ ڤەكریە و بهایێ پێدڤیێن ولاتیان د ڤی بازاریدا كێمترن ژ بازارێن دی و ئاشكرا كر، هەر ب ڤێ هەلكەفتێ ب هەماهەنگی ل گەل لایەنێن پەیوەندیدار و ب هەڤكاری ل گەل دەزگەهێ خێرخوازییێ بارزانی و نەخوشخانەیا شریان پشكا تاقیگە و شرۆڤەكرنێ پرۆژەیەك راگەهاندییە ب داشكاندنا 50٪ بۆ فەرمانبەران و وان ژی بۆ قوناغا ئێكێ 500 كارت ب سەر فەرمانبەراندا دابەشكرینە بۆ مەرەما ئەنجامدانا تاقیكرن و شروڤەكرنا جورێن نەخوشییان.
دەشتی شەوكەت، بەرپرسێ پشكا بازاری ل رێڤەبەریا خۆ پاراستنێ ل دهۆكێ گۆت: ژ پێخەمەت پاراستنا گیانێ ولاتییان، ئەو سالانە بەرنامەیەكی دادرێژن بۆ مەبەستا دووڤچوونێ ل بازار و مۆل و دوكان و كارگە و كۆگەهان، نەخاسمە ل هەیڤا رەمەزانا پیرۆز ئەو گرنگییێ ب جهێن ئامادەكرن و فروتنا شڕیناهی و شەڕبەتان ددەن و ل روژێن بەری چەژنێ جودا ژێ هەمی كەرەستەیێن دی ئەو ب رژدی دووڤچوونێ ل سەر جورێن چەرەز و چكلێتان دكەن و ب رێكا روژنامەیا ئەڤرۆ داخواز ژ ولاتی و بكڕان كر كەل و پەل و كەرەستەیێن بێ دەستووری بۆ روژانێن خۆ دابین نەكەن دا كۆ بشێن ل دەمێ دروستبوونا هەر ئەگەرەكێ بگەهنە ژێدەری.
