قارەمانا چامپیۆنزێ بەرانبەر جەنگاوەرێن ئنگلتەرایێ دێ شەڕێ ناسناڤی كەن
حەز ژێكەر و پشتەڤانێن یارییا فوتبۆلێ ل جیهانێ چاڤەڕێ یارییا فینالا ئەڤرۆ ل دەمژمێر 10ی شەڤن ئەوا دێ د ناڤبەرا هەردو یانەیێن پاریس سانجێرمان یا فرەنسی قارەمانا چامپیۆنز لیگا و یانەیا چێلسی یا ئنگلتەرایێ ئەوا دێ ل یاریگەها میتلایڤ ل وەلاتێ ئەمریكا ژ چارچووڤەیێ قارەمانییا كۆپا جیهانێ بۆ یانەیان مۆندیالا 2025ێ.
یانەیا پاریس سانجێرمان شیا دەربازبیتە یارییا دووماهیێ پشتی سەركەڤتنەكا مەزن ل سەر یانەیا ڕیال مەدرید یا ئسپانی ئینایی ب چار گۆلێن پاقژ، ژلایێ خوەڤە یانەیا چێلسی دەربازبوو یارییا دووماهیێ پشتی ب سەركەڤتی ل سەر یانەیا فلۆمینینسی یا بەرازیلی ئیناییب دو گۆلان بێ بەرانبەر.
ئەرێ چێلسی دێ مفایی ژ دیرۆكا خوە وەرگریت؟
یانەیا چێلسی دیرۆكەكا باش یا د مۆندیالا یانەیان دا هەیی، ئەوا دبیتە جارا سێیێ یە د دیرۆكا خوە دا دەربازبتە یارییا فینالێ، ئێكەم جارا گەهشتییا یارییا دووماهیێ ل 2012ێ ئەوا ل چاپانێ هاتییە كرن و نەشیایی ناسناڤی ب دەستڤە بینت، ل سالا 2021 شیا ئێكەم ناسناڤێ مۆندیالێ بدەستڤە بینت ئەوا ل وەلاتێ ئیماراتێ هاتبوو كرن پشتی ب سەركەڤتی ل سەر یانەیا پالمێراس یا بەرازیلی و دێ بزاڤێ كەت بگەهیتە ناسناڤێن بایرن میۆنخ و كۆرینسیانز.
پاریس سانجێرمان ب تاما چامپیۆنزێ ناسناڤێ یانەیان ژی دڤێت
بۆ جار ئێكێ یە د دیرۆكا خوە دا تیما یانەیا پاریس سانجێرمان یا فرەنسی دەرباز دبیتە یارییا دووماهییا كۆپا مۆندیالا جیهانی ئەوا بۆ وەرزێ ئەڤ سالە شیایی ناسناڤێ چامپیۆنزێ ژی ب دەستڤە بینت، دێ پشت بەستن ل سەر دو هێزێن خوە كەت یا ئێكێ وەكو قارەمانا چامپیۆنزێ و یا دویێ سەركەڤتنا وێ ل سەر ئێك ژ مەزنە یانەیێن جیهانی ریال مەدرید خودانا پێنج ناسناڤێن كۆپا مۆندیالا جیهانی، دێ هێتە دناڤ یاریگەهێ دا ب گیان و مۆرالەكا بلند و هیڤیێن دەستڤە ئینانا ناسناڤی كو د هەر دەمەكی دا بوو وێ نێزكترە.
بۆ زانین 63 یاری د 12 یاریگەهان دا هاتیە كرن كو دهێتە هژمارتن بۆ جارا ئێكێیە د دیرۆكا ڤێ قارەمانیێ دا 32 یانە پشكداربن ل جهێ هەشت یانەیان ئەوا هەر ژ سالا 2000ێ دەستپێكری، بڕیار هاتیە دان بۆ چار سالان جارەكێ بهێتە ڕێكخستن ل جهێ هەر سال.
قارەمانێن مۆندیالی كیش یانە بووینە؟
یانەیا ریال مەدرید خودان پترترین ناسناڤە، پێنچ جاران دەستڤە ئینایە، بەرشەلۆنا سێ ناسناڤ، یانەیا بایرن میۆنخ یا ئەلمانی دو ناسناڤ. هەرئێك یانەیێن بەرازیلی كۆرینسیانز دو ناسناڤی، ساۆپاولۆ و ئینتەرناسیۆنال ئێك ناسناڤ، یانەیێن ئنگلتەرایێ لیڤەرپۆل، مانچستەر یۆنایتد، مانچستەر ستی و چێلسی ئێك ناسناڤ، هەردو یانەیێن ئیتالی ئینتەر میلان و ئەی سی میلان هەر ئێك ناسناڤەك، دهێتە چاڤەڕێ كرن مۆندیالا 2029ێ وەلاتێ قەتەر مێڤاندارییا وێ بكەت.
