قارەمانییا فوتسالا كچێن كوردستانێ هاتە پاشئێخستن
د داخویانیەكێ دا سكرتێرێ یانەیا ئافرەتێن دهۆكێ یا وەرزشی دیار كر ئەو هاتە ئاگەهداركرن كو قارەمانییا فوتسالا كچێن كوردستانێ ل سەر ئاستێ تازەپێگەهشتییان بۆ دەمەكێ نە دیار هاتە پاشئێخستن، ئەوا بڕیار بوو ل 23ێ ڤێ مەهێ ل هەولێرا پایتەخت هاتبا كرن.
زێدەتر سلێمان زەكی محەمەدسالح بۆ رۆژنامەیا ئەڤرۆ گۆت: هەرچەندە ل حەفتییا بۆری كۆمبوون دگەل 15 یانەیێن پشكدار د قارەمانیێ دا هاتبوو ئەنجامدان تێدا ڕێنما و پێزانین ل سەر قارەمانیێ ئەوا ب ناڤێ قارەمانییا پیلستانگ بۆ ژیێن لبن 18 سالی ڤە هاتبوو شرۆڤەكرن، لێ دوهی ژ نشكەكێ ڤە هاتینە ئاگەهداركرن كو قارەمانی بۆ دەمەكێ نە دیار هاتە پاشئێخستن ژ بەر ئەگەرێن كارگێری و هونەری بووینە و دێ د ڤێ حەفتیێ دا ژڤانەكێ نوو هێتە دانان.
هەروەسان ناڤهاتی گۆت: وەكو كارگێرییا یانەیا ئافرەتێن دهۆكێ هەردەم مە بزاڤ كرینە بۆ هەر پشتكدارییەكا كوردستانی و ئیراقێ گرنگییەكا مەزن پێ بدەین و دەلیڤەیەكا زێرین بۆ هەموو یاریزانێن كچ یێن باژێرێ خوە بدەین پێخەمەت بلندكرنا ئاستێ وەرزشا كچان، لەوما ژی هەرزوو مە دەست ب ڕاهێنانان كر ب سەرپەرشتییا كاپتن ئاراز سالح و هاریكارێ وی كاپتن سیپەل شوكر و ڕاهێنەرا گۆلپارێزان دەریا یونس و هەموو یاریزانێن مە ژی كچێن باژێرێ مەنە و ژیێن بچووكن كو دێ بنە پاشەرۆژەكا گەش بۆ یانەیێ.
سكرتێرێ یانەیا ئافرەتێن دهۆكێ گۆت ژی: بۆ هەر پشكدارییەكێ ئەم پلانان بۆ دەستڤە ئینانا ناسناڤەكی ددانیت، پێنەڤێت پشكدارییا مە ب پشتەڤانییا د. عەلی تەتەر پارێزگارێ دهۆكێ ئەوێ هەردەم هاریكارییا یانەیێ دكەت و یا مە ژی پلان دانانە ژبۆ دەستكەڤتەكێ نوو بۆ ناڤێ پارێزگەها دهۆكێ و پێشئێخستنا ئاستێ وەرزشا كچان.
