قارەمانێن هەر پێنج خولێن مەزنە ئۆرۆپا ئێكلا بوون
قارەمانێن هەر پێنچ خولێن ئۆرۆپا یێن وەلاتێ ئسپانیا، ئیتالیا، ئنگلتەرا، ئەلمانیا و فرەنسا بۆ وەرزێ 2022- 2023 هاتینە ئێكلاكرن بەری ب دووماهی هاتنا هندەك خولان ب چار گەڕان كو دهێنە هژمارتن پێنچ مەزنە خولێن ئۆرۆپا و جیهانێ ژبەر هەبوونا باشترین یاریزانێن جیهانێ د ناڤ خولێ دا و جەماوەرەكێ ئێكچار مەزن دووڤچوونا وان دكەن
مانچستەر ستی ناسناڤێ سێیێ ل دووڤ ئێك دەستڤە ئینا.
یانەیا مانچستەر ستی شیا بوو جارا پێنج د شەش وەرزێن بۆری دا و یا سێیێ ل دووڤ ئێك ناسناڤێ خولا پلا ئێكا ئنگلتەرایێ پرێمەرلیگ ب دەستڤە بینت، ب كۆمكرنا 89 خالان و جووداهیا هەشت خالان شیا خوە ژ هەڤڕكا خوە ئارسنال بۆریت ئەوا د دەمەكی دا نێزكتربوو بۆ ناسناڤی، هێرشبەرێ مانچستەر ستی یێ نەرویجی ئیرلینگ هالاند ناسناڤێ گۆلكەری ئێكلاكریە ئەوێ 36 گۆل تۆماركرین و هەڤڕكی وی یێ تۆتنهام هاری كین 28 گۆل تۆماركرین و حەفتیا بهێت دێ بفەرمی هێتە راگەهاندن.
بەرشەلۆنا ڤەگەڕیا ناسناڤێن ئسپانیا
ژلایێ خوەڤە یانەیا بەرشەلۆنا ڤەگەڕیا ناسناڤێ خولێ پشتی دووركەفتنێ هەر ژ وەرزێ 2018-2019 كو دبیتە ناسناڤێ 72ێ د دیرۆكا خوە دا، ب85 خالان رێزا ئێكێ دهێت ب جوداهیا هەشت خالان ریال رێزا دویێ یە ب77 خالان و ناسناڤێ وەرزێ ئەڤ سالە یێ پلا ئێك لالیگا ب دەستڤە ئینا، هێرشبەرێ بەرشەلۆنا یێ پۆلەندی رۆبێرت لیڤاندۆڤێسكی 23 گۆل تۆماركرینە و نێزیكی ناسناڤێ گۆلكەرێ خولێ یە، كەریم بنزێمە هێرشبەرێ ریالێ 18 گۆل یێن هەین و یاریا حەفتیا بهێت ئەوژی دێ ب فەرمی دیاربیت.
ناپۆلی هەسپێ رەش بوو قارەمانێ ئیتالیا
پشتی دووركەفتنێ بۆ ماوەیێ 23 سالان یانەیا ناپۆلی ڤەكەڕیا ناسناڤێ خولا ئیتالیا بۆ جارا سێیێ د دیرۆكا خوە دا و یا ئێكێ پشتی وەرزێ 1989-1990ێ، ئەڤ یانە وەكو هەسپێ رەش هاتە ناڤكرن و شیا پێشكەڤیت ل سەر مەزنێن ئیتالیا و 86 خال كۆمكرن ب جووداهیەكا بەرچاڤ ژ ئەنتەر میلان ئەوا 69 خال كۆمكرین، هەڤڕكی بۆ ناسناڤێ گۆلكەرێ خولێ دێ حەفتییا بهێت ئێكلابیت دناڤبەرا هێرشبەرێ ناپۆلی ڤیكتۆر ئۆسێمین خودانێ 23 گۆلان و یێ ئەنتەر میلان لاوتارۆ مارتینێز خودانێ 21 گۆلان.
بایرن ب خولەكێن دووماهیێ و سیستەمێ خولێ بوو قارەمان
د خولا ئەلمانیا دا ناسناڤێ وەرزێ ئەڤ سالە یا ئاگرین بوو هەتا دووماهی چركە ژ یاریا خولێ د ناڤبەرا هەردو یانەیێن بایرن میۆیخ و بوروسیا دۆرتمۆند، یانەیا بایرن ب جوداهیا گۆلان شیا ببیتە قارەمانا خولێ ئەوا هەردو تیم ب 71 خالان رێزێن ئێكێ و دویێ هاتین، هەرچەندە بوروسیا رێزا ئێكێ بوو بەری دووماهی یاری و دناڤ ئەرد و جەماوەرێ خوە دا پێدڤی ب سەركەفتنێ بوو ژبۆ مسۆگەركرنا ناسناڤی لێ دگەل ماینێز ب 2-2 وەكهەڤبوو بەرانبەر دا بایرن ب 2-1 و دخولەكا 89ێ دا سەركەفتن ل سەر خودانێن ئەردی كۆلن ئینا و بوو قارەمانا ئەلەمانیا، سەرباری هەردو تیما وەكو ئێك خال هەبوون لێ سیستەمێ خولێ ڤەگەڕیا ئەو یاریێن دناڤبەرا وان دا هاتیە كرن كو دبەرژوەندیا بایرنێ هاتە ئێكلا كرن، د هەردو یاریێن خولێ دا بایرن میۆنخ ب وەكهەڤی و سەركەفتنەكێ ب دووماهی ئینابوو، كریستۆف نكونكو ب تۆماركرنا 16 گۆلان بوو گۆلكەرێ خولێ.
پاریس سانجێرمان قەرەبوویا چامپیۆنزێ ب ناسناڤێ خولێ كر
ژلایەكێ دووڤە یانەیا پاریس سانجێرمان ناسناڤێ خولا فرەنسا بۆ وەرزێ دویێ ل دووڤ ئێك پاراست و یا پێنجێ د شەش وەرزێن بوری دا و قەربوویا ژ دەستدانا چامپیۆنز لیگێ كر، ب گشتی دبنە 11 ناسناڤ، سانجێرمانێ 85 خال كۆمكرینە ب چار خالان ژ هەڤڕكا خوە لانس ئەو رێزا دویێ دهێت و یاریەك بتنێ یامایی، بەری ب دووماهی هاتنا خولێ ب ئێك گەڕان هێرشبەرێ پاریسێ كێلیان مباپی ب28 گۆلان رێزا ئێكێ یە و یێ یانەیا لیۆن ئەلیكسەندەر لاكازێت ب27 گۆلان رێزا دویێ دهێت، شەمبیا بهێت دێ گۆلكەرێ خولێ دیاربیت.
