قاسم شه‌شۆ: دبیت ره‌وشا شنگالێ خراپتر ببیت
دهۆك، له‌زگین جوقی
قاسم شه‌شۆ، فه‌رماندێ هێزا پێشمه‌رگه‌ی ل شنگالێ راگه‌هاند، شنگال دخراپترین ره‌وش دایه و نوكه خه‌لكێ شنگالێ تووشی چه‌ندێن ئاسته‌نگان بوویه ژبه‌ر هه‌بوونا گرۆپێن چه‌كدار و نه‌بوونا ئێدارا شه‌رعی ل شنگالێ.
قاسم شه‌شۆی، گۆت ژی” وه‌سا دیاره فشار ل سه‌ر به‌غدا دهێته كرن كو نه‌شێت ره‌وشا شنگالێ چاره‌سه‌ر بكه‌ت ژ به‌ر كو رێككه‌فتن د ناڤبه‌را حوكمه‌تا هه‌رێما كوردستانێ و ئیراقێ دا هاتبوو كرن لێ وه‌سا دیاره هنده‌ك وه‌لات رێگریێ ل به‌غدا دكه‌ن بۆ بجهنه‌ئێنانا رێككه‌فتنا شنگالێ”.
شه‌شۆی ئاماژه‌كر” چو ته‌ناهی ل شنگالێ نینه له‌ورا ئاواره نه‌شێن ڤه‌گه‌رن وهه‌كه ره‌وشا شنگالێ وه‌سا خراب بمینیت چو جاران ئاوارێن شنگالێ ناڤه‌گه‌رن چونكو به‌غدا كونترۆل ل سه‌ر شنگالێ ننینه و به‌ره‌لایی یا تێدا هه‌ی و ب ده‌هان هێز و گرۆپێن چه‌كدار دناڤ شنگالێ دا هه‌نه كو هه‌ر ئێك بۆ مه‌ره‌م وبه‌رژوه‌ندیێن خوه كار دكه‌ت و ئه‌و یێن بووینه ئه‌گه‌ر ره‌وشا شنگالێ گه‌له‌ك ئالۆز ببیت كو چ ژ وان گرۆپان ژبۆ خزمه‌تكرنا وه‌لاتیان ل شنگالێ كار ناكه‌ت”.
دیاركر ژی كو خه‌لكێ شنگالێ یێن تووشی چه‌ندێن ئاسته‌نگان بووین ژبه‌ر نه‌بوونا ئێدارا شه‌رعی ل شنگالێ ژ به‌ر كو خه‌لك نه‌شێن ژ شنگالێ قه‌ستا قایمقامیا شنگالێ ل دهۆكێ بكه‌ن بۆ ب رێڤه‌برنا كاروبارێن خوه، له‌ورا ژی هه‌كه رێككه‌فتنا شنگالێ بجه بهیت دێ هه‌موو كیشه و ئاسته‌نگێن وه‌لاتیان چاره‌سه‌ربن، لێ ده‌ستێ حه‌شدا شه‌عبی كه‌فتیه د ناڤ شنگالێ دا وب رێیا وان ئالوزی ل شنگالێ په‌یدا دبن.
قاسم شه‌شۆ ، ئاشكرا كر “داخوازیا خه‌لكێ شنگالێ ئه‌وه پێشمه‌رگه ڤه‌گه‌ریته د شنگالێ دا داكو ئێدارا شه‌رعی بزڤریت وته‌ناهی و ئاڤه‌دانی ل شنگالێ ده‌ست پێ بكه‌ت وئاواره بزڤرنه سه‌ر جهێن خوه كو ب راستی خه‌لكێ شنگال بیزاربووینه ژبه‌ر خرابیا ره‌وشا وێ كو پشتی له‌شكرێ ئیراقێ ژی هاتیه د ناڤ شنگالێ، لێ هه‌ر ره‌وشا شنگالێ خراب مایه و چو گوهوۆرێن چینه‌بووینه بۆ باشكرنا ره‌وشا ته‌ناهیێ ل شنگالێ چونكو هه‌ر گرۆپێن چه‌كدار یێن تێدا ماین و وه‌سا دیاره رێككه‌فتن دناڤبه‌را واندا هاتیه كرن له‌ورا ژی ره‌وشا شنگالێ خراب مایه و دبیت ره‌وشا وێ خراپتر ببیت وباشتر نه‌بیت ژ به‌ر هه‌بوونا گرۆپێن چه‌كدار كو رێككه‌فتن هاتبوو كرن د ناڤبه‌را حوكمه‌تا هه‌رێما كوردستانێ و ئیراقێ دا بۆ ئاساییكرنا ره‌وشا شنگالێ لێ وه‌سا دیاره به‌غدا ئه‌و رێككه‌فتن بجه نه‌ئینا ودبیت فشارێن ده‌وله‌تان ل سه‌ر به‌غدا هه‌بن كو نه‌شێت رێككه‌فتنا ئاساییكرنا ره‌وشا شنگالێ بجه بینیت”.
