قانوونا پاراستنا کوردان دێ بیتە ئەگەرێ گوهۆڕینێن مەزن ل دەڤەرێ
بسپۆرەکێ کاروبارێن رۆژهەلاتا ناڤین دیار دکەت، هەکە قانوونا پاراستنا کوردان ژ ئالیێ کۆنگرێسێ ئەمریکا ڤە بهێتە پەسەند کرن دێ بیتە ئەگەرێ گوهۆڕینێن گەلەک مەزن ل رۆژهەلاتا ناڤین چونکی ئەو قانوون تنێ بۆ کوردێن رۆژئاڤایێ کوردستانێ نینە.
گران ئۆزجان بسپۆرێ کاروبارێن رۆژهەلاتا ناڤین دیار کر، قانوونا پاراستنا کوردان وەکو وێ قانوونێ یە کو بەری سەد سالان ژ ئالیێ بریتانیا ڤە بۆ پاراستنا جوهیان هاتە دەرخستن و پشتی وێ قانوونێ ژی گوهۆڕینێن گەلەک مەزن روو دان و دەولەتا ئسرائیلێ هاتە ئاڤاکرن و گۆت: (بێگومان قانوونا ژ ئالیێ سیناتۆر گراهامی ڤە هاتیە ئامادە کرن تنێ بۆ پاراستنا کوردێن رۆژئاڤایێ کوردستانێ نینە، راستە نها وەسا دهێتە گۆتن کو تنێ ژ بۆ پاراستنا کوردێن سووریێ یە، لێ د راستی دا ئەو قانوون هەکە بهێتە پەسەند کرن ژ بۆ هەموو کوردانە، ئانکو ژ بۆ کوردێن باکور، رۆژهەلات و هەرێما کوردستانێ یە ژی، هەر مەترسیەک ل پاشەرۆژێ ل سەر کوردان بهێتە دروست کرن دێ ل گۆر وێ قانوونێ کورد هێنە پاراستن).
ناڤهاتی ئەو یەک ژی دیار کر، تورکیا و چەند وەلاتێن عەرەبی یێ بزاڤا دکەن ئاستەنگان دروست بکەن، مە دیت کا چاوا لیندسی گراهام ب توندی هۆشداری دا عەرەبستانا سعوودی کو ئاستەنگان دروست نەکەن و ب هەمان رەنگی ژی ب توندی هۆشداری دا تورکیا، چونکی تورکیا و هندەک ژ وەلاتێن عەرەبی باش دزانن ب پەسەندکرنا وێ قانوونێ دێ گوهۆڕینێن گەلەک مەزن ل رۆژهەلاتا ناڤین روو دەن و گۆت: (دێ گوهۆڕینێن گەلەک مەزن روو دەن و گوهۆڕین ژی دێ د بەرژەوەندیا کوردان دا بن، ژ بەر ڤێ یەکێ ژی ترسەک مەزن ل دەف تورکیا و هندەک ژ وەلاتێن عەرەبی دروست بوویە، بەری نها مسرێ، قەتەرێ و هەتا سەرۆکێ حەماسێ ژی بەحسێ ڤێ یەکێ کرن ئەو رێ نادەن سووریێ بهێتە پارچەکرن، ئانکو هەست ب گرنگیا قانوونا پاراستنا کوردان هاتیە کرن و ئەو قانوون دێ بیتە ئەگەر کورد ل رۆژهەلاتا ناڤین گەهنە مافێن خوە).
گران ئۆزجان ئەو یەک ژی دیار کر، رۆۆژهەلاتا ناڤین بەر ب گوهۆڕینێن گەلەک مەزن ڤە دچیت و هەر گوهۆڕینەک ژی دروست ببیت د بەرژەوەندیا کوردان دایە، چونکی سیستەمێ نها یێ رۆژهەلاتا ناڤین ل سەر بنەمایێ ئینکارکرنا کوردان هاتیە دروست کرن، بێگومان د دەمەکێ وەسا دا هەکە قانوونا پاراستنا کوردان بهێتە پەسەند کرن دێ بیتە پشتەڤانیەکا گەلەک مەزن بۆ کوردان، دڤێت هەموو هێز و ئالیێن سیاسی یێن کوردان ژی ب گرنگی ل سەر قانوونا پاراستنا کوردان کار بکەن، چونکی ئەو قانوون دێ بیتە پشتەڤانیەکا مەزن و جیهانی بۆ هەموو کوردان.
