قانوونهك بۆ كاری دێ هێته دهركرن
ههولێر، قائید میرۆ:
بهرپرسهكێ وهزارهتا كار و كاروبارێن جڤاكی ئاشكرا كر، پڕۆژه قانوونا كاری هاتیه بهرههڤكرن و پشتی پهسهندكرنێ دێ كاریگهری ل سهر كهرتێ تایبهت و مافێ كرێكاران ل ههرێما كوردستانێ ههبیت و دبێژیت: قانوونا بهرێ گهلهك ڤالاهی تێدا ههبوون.
دكتۆر عارف حیتۆ، بریكارێ وهزارهتا كار و كاروبارێن جڤاكی یا حوكمهتا ههرێما كوردستانێ بۆ رۆژناما ئهڤرۆ ئاشكرا كر، ههتا نوكه ل ههرێما كوردستانێ كار ب قانوونا ههژماره 71 یا سالا 1978ێ یا كاری دهێته كرن و گۆت: “ژ بهر بۆرینا چهندین سالان ل سهر دهركرنا ئهڤێ قانوونێ و گوهۆڕینێن د بازاڕی دا هاتینه كرن، ئهو قانوون پێدڤی ب راستڤهكرنێ ههیه، بهری چهندین سالان مه بزاڤێن راستڤهكرنا ئهڤێ قانوونێ كرینه، كو ل گهل سهردهمێ نوكهیێ كاری بگونجیت، ئهم ل گهل لایهنێن پهیوهندیدار كار بۆ دهركرنا قانوونا كاری ل ههرێما كوردستانێ دكهین”.
دكتۆر عارف حیتۆ گۆتژی: “رهشنڤیسێ پڕۆژهقانوونا كاری هاتیه بهرههڤكرن و پێشكێشی پهرلهمانێ كوردستانێ دێ هێته كرن بۆ پهسهندكرنێ، بێگومان پشتی پهسهندكرنێ ژی دێ كاریگهری ههبن، ژ بهركو گهلهك ڤالاهی د قانوونا بهرێ دا ههیه و ئهم دخوازین ئهو ڤالاهی نهمینن، ب تایبهتی پاراستنا مافێ كرێكاری و ڤهژاندنا كهرتێ تایبهت، ههروهسا چهندین هووركاری ل دۆر گرێبهستا كاری و دهمژمێرێن كاری و پهیوهندیێن د ناڤبهرا كرێكار و خودانكاری دا هاتینه بهرچاڤ كرن”.
