قانوونێ هەتا رادهیهكی بهڕهڤانی ژ دهینداری كریه
ههولێر، قائید میرۆ:
پاریزهرهكی دیار کر کو ل گورهی قانوونا جێبهجێكرنێ دهست بسهر مال و مولکێ كهسێ دهیندار دهێته گرتن، بهلێ ئهگهر كهسێ دهیندار تشتەک بتنێ ههبیت دهست بسهردا ناهێته گرتن و گۆت؛ قانوونێ هەتا رادهیهكی بهڕهڤانی ل دهینداری كریه.
پارێزهر شالاو ئهبوبهكر د دیدارەکێ دا بۆ رۆژنامەیا ئهڤرۆ دیار كر، ئێك ژ وان ئاریشهیێن نوكه ل ههرێما كوردستانێ ههی و یا بهر بهلاڤ ئاریشهیا دەیندارایە، كهسێن دهیندار بهردهوام سكالا لسهر دهێته تۆماركرن ل دادگههێ و خوادانێن دەینی داخوازا دهینێ خوه دكهن.
شالاو دیار کر، ل گورهی قانوونا جێبهجێكرنێ ئهگهر كهسهك یێ دەیندار بیت، ئەڤجا چ دەیندارێ كهسهكی بیت یان یێ هژمارهكا كهسان بیت، ل دهمێ ئێكلابوونا سكالایێ لسهر كهسێ دەیندار دهست بسهر مال و مولكێ كهسێ دەیندار دهێته گرتن و گۆت؛ بەلێ ئهگهر كهسێ دەیندار مال و مولك ژی ههبیت ل گورهی ماددێ 62 ژ قانوونا جێبهجێكرنێ دهست بسهردا ناهێته گرتن.
پارێزەری د بەردەوامیا ئاخفتنێن خۆدا گۆت؛ بۆ نموونه ل گورهی برگا 14ـێ هەکە دهیندار ملیۆن دۆلارانژی یێ دەیندار بیت و ئێك مولك بتنێ ههبیت، ئەڤجا خانی بیت یان ئهرد بیت دهست بسهردا ناهێته گرتن ل جهێ دەینی، یانژی ئهگهر كهسێ دهیندار ترۆمبێل ههبیت و بۆ كاركرنێ بكاربینیت ئهوژی مینا ترۆمبێلێن تهكسی و پاس و بارههلگر دهست بسهردا ناهێته گرتن.
پارێزەری دا زانین ژی، ئهگهر كهسێ دەیندار موچه ههبیت نابیت زێدهتر ژ ئێك لسهر پێنج یا موچێ وی بۆ دەینی بچیت، رهخنهیێن زۆر ل ئهڤێ قانوونا جێبهجێكرنی دهێنه گرتن، بهلێ قانوونێ ههتا رادهیهكی بهڕهڤانی ل كهسێ دهیندار كریه داکو بژیت و دهینداری نهبیته ئهگهرێ ڤێ چهندێ ههموو مال و مولكێ وی بۆ دەینی بچیت.
