قانوون زارۆیێن سەر جادێ ناپارێزیت
ئه‌ڤرۆ:
سال بۆ سالێ دیاردا کارکرنا زارۆیان ل سەر جادا یا گەش دبیت و یا بوویە نەریتەک و رێخۆشکەرەک کو دایک و باب زێدەتر زارۆیێن خوە بھنێرنە سەرجادا بۆ ھندێ دلێ خەلکی بۆ بسۆژیت و زێدەتر پارا بدەنێ، د سەر ھندێ را ل سالا بووری و ھاتنا ئاواران یا زێدە، ئەڤ دیاردە ھێشتا زێدەتر لێ کر. چالاکڤانەکا ڤی بواری ژی دیار کر کو چو قانوون نینن مافێ زارۆیێن سەر جادا بپارێزن.
د کابینا حەفت ھەموویێ دا وەزارەتا کار و کاروبارێن جڤاکی ب کوتەک شیان پرۆژە قانوونەکێ ئامادە بکەن بۆ پاراستنا مافێن زارۆیان، لێ ئەو ژی خۆلا پەرلەمانێ کوردستانێ ب دووماھی ھات بەری ئەڤ پرۆژە قانوونە بھێتە پەسەنکرن و بکەڤیتە د بوارێ جێبەجێکرنێ دا، ئەڤە ددەمەکێ دایە ڤیابا بەری چەندین سالان ئەڤ قانوونە ھاتبا دەرکرن، دەمێ بەحسێ وی پرۆژە قانوونێ دکەن کو ب شێوەیەکێ جوان ھاتیە دارشتن، دا زارۆیێن کوردستانێ ب مافێن خوە شاد بن و من باوەرە ل ژێر وێ قانوونێ، مافێن زارۆیان دێ ھێنە پاراستن، ژبەر گرنگیا ڤێ قانوونێ د ڤی دەمی دا.
رێکخراوێن تایبەتمەند ب زارۆیان ڤە ل دھۆکێ، گەلەک گازندە ل سەر خازۆکیا وان زارۆیان ھەبوو ئەوێن ل ترافیکێن دھۆکێ کار دکر، وان رێکخراوا و لایەنێن پەیوەندیدار ل سەر دەمێ ئیدارا بەرێ یا پارێزگەھێ کۆمبوون ئەنجام دان، ژ بۆ گەھشتن بۆ چارەیەکێ ژ بۆ قەدەغەکرنا کارێ خازۆکیێ، لێ چو رۆژا پاشتر بۆ دیاردا خازۆکیێ ژ لایێ زارۆیان ڤە ل ترافیکان و ل بازارێ دھۆکێ بەر ب زێدەبوونێ بوو.
بەیان ئەحمەد بریاردەرا لژنا کاروبارێن جڤاکی و خێزان و زارۆیان ل پەرلەمانێ کوردستانێ د خۆلا بەری نھا دا بۆ ئەڤرۆ دیار کر، بیرۆکا ڤی پرۆژە قانوونێ ژ ئالیێ وێ ب خۆڤە ھاتبوو بلندکرن، چونکو وێ ھەست ب وێ یەکێ دکر ڤالاتیەکا مەزن د ڤی بیاڤی دا ھەیە و گۆت: پاراستنا مافێن زارۆی یا پرت و بەلاڤەیە و پێدڤی ب قانوونەکا تایبەتن، ئەڤ قانوونا وان بەری نھا گفتوگو ل سەر کری یا تایبەتمەندە ب زارۆکی ڤە و ئارمانجێن روون و ئاشکرا ھەنە و مافێن زارۆکی د ھەموو وارەکی دا دێ ھێنە دەستەبەرکرن.
ئاماژە ب وێ چەندێ کر کو ئەڤ قانوونا ھاتیە دانان یا ب تێر و تەسەلە و دێ ژیانا زارۆی ب خۆڤە گریت ھەر ژ رۆژا بوونێ و ھەتا ژ قوناغا زارۆکینیێ ب دووماھی دھێت و مفا ژ چەندین قانوونێ ڤی بواری یێن وەلاتێن پێشکەفتی ھاتبوو وەرگرتن و گۆت: ھندەک بڕگێن ڤێ قانوونێ بۆ وان زارۆیان ھاتیە دانان یێن پشتی ژێکڤەبوونا دایک و بابان مافێن وان د پارێزن.
سەیران سالح، سەرۆکا رێکخراوا ئەستێرەی مندالان ل ھەرێما کوردستانێ راگەھاند، کارکرنا زارۆیێن ل سەر جادە و ترافیکان د زێدەبوونێ دایە و ئەڤە د دەمەکی دایە کو چو قانوون نینن مافێن وان زارۆیان بپارێزن و چو قانوون ژ پەرلەمانێ کوردستانێ دەرنەچووینە کو مافێن وان زارۆیان بپارێزن و گۆت: ل سالا بووری ژ بەر زێدەبوونا رێژا ئاواران و کارکرنا زارۆیێن وان ل سەر جادا، چو ئامار د ڤی بیاڤی دا نەھاتینە بەرھەڤکرن.
خویاژی کر، ل سالا بووری پتریا وان زارۆیێن ل سەر جادا کاردکر ئاوارەبوون و ژ بەر تێکچوونا رەوشا وان یا ئابووری ئەڤ کارە دکر و ب تنێ بۆ ھندێ بوو دا پێ بژین و ھندەک زارۆ ژی ھەبوون دایک و بابێن وان ئەڤ پالڤەدان بۆ کارکرنێ ژ بەر نالەباریا رەوشا ئابووری یا خێزانێ و ھندەک ژی ئەنقەست دھێن ڤی کاری دکەن و گۆت ژی: پتریا وان زارۆیێن ل سەر جادا کاردکەن ل ژێر تەمەنێ ١٤ سالیێ دا نە و ئەڤە ژی ئاریشەکا مەزنە ل ھەرێما کوردستانێ پەیدابووی.
پەرێ سالح محەمەد سالح، ئەنداما پەرلەمانێ کوردستانێ و بریاردەرا لیژنا کاروبارێن جڤاکی و خێزان و زارۆیان ل پەرلەمانێ کوردستانێ د خۆلا نھا دا ل دور ڤی بابەتی دیار کر، راستە کو ھەتا نوکە چو قانوون نینن زارۆیێن سەر جادا بپارێزیت و گۆت: نھا پرۆژەیەکێ مەزن ژ لایێ لیژنا وان ڤە دھێتە بەرھەڤکرن بۆ ھندێ ل داھاتی کێشە و ئاریشێن زارۆیێن سەر جادا چارەسەربکەن و ل مەزناھیا خوە دا نەبنە تاوانبار.
ئەنداما پەرلەمانێ کوردستانێ خویا کر، ھەکە زارۆ ل سەر جادا کاربکەن، دێ کارتێکرنەکا مەزن ل سەر ئایندێ وان ھێتە کرن و کەساتیەکا خراب ژ وان ھێتە چێکرن.
ئه‌مير ئه‌ترووشى بۆ رۆژناما ئه‌ڤرۆ ئاماده‌كريه
