قاچاغی ب ئارێ وه‌لاتیان دهێته كرن
زاخۆ، عه‌لی حاجی:
رێڤه‌به‌رێ چاڤدێریا بازرگانی ل زاخۆ بۆ رۆژناما ئه‌ڤرۆ دیار كر، كارێ قاچاغیێ ژلایێ هنده‌ك كه‌سان ڤه ب ئارێ به‌لاڤكرنێ دهێته كرن و دبێژیت: پێدڤی یه ئه‌ڤ چه‌نده بهێته چاره‌سه‌ركرن، دا كو ئار زێده‌تر نه‌هێته كونترۆل كرن.
داخاز حسێن، رێڤه‌به‌رێ چاڤدێریا بازرگانی ل زاخۆ گۆت: “هنده‌ك كه‌س ب هاریكاریا بریكارێن به‌لاڤكرنا ئاهێن خوارنێ یێن هه‌یڤانه بازرگانیێ ب ئارێ وه‌لاتیان دكه‌ن كو ب ره‌نگه‌كێ كارگه‌ها دروستكرنا ئاری بێ به‌رامبه‌ر هه‌یڤانه گه‌نمی ژ حكومه‌تێ وه‌ردگریت بۆ دروست كرنا ئاری، به‌لێ ده‌مه‌كه بریكارێن به‌لاڤكرنا ئاهێن خوارنێ ئه‌و پشكا هه‌یڤانه یا ئاری به‌ر وی دكه‌ڤیت هه‌می پشكا خوه نادانیت دێ نیڤه‌كا وێ پشكێ دانیت و ئه‌و ئارێ مایی دوباره دێ بۆ كارگه‌هێ ڤه‌گه‌ڕینیت و ئه‌و كارگه‌ه ژی دێ وی ئاری عمبار كه‌ت، داكو د هه‌یڤا دووڤ دا هه‌ر وی ئاری دوباره به‌لاڤ بكه‌ت و ئه‌و پشكا كوحمه‌ت پێ ده‌ت دێ بۆ كارگه‌هێ مینیت و وی گه‌نمی فرۆشیت، ئه‌ڤه ژی دبیته ئه‌گه‌ر ئار كێمتر د ناڤ بازاری دا بمینیت یان ژی هنده‌ك كه‌س وی ئاری دێ ژ بریكاران كرن و د ناڤ بازاری دا گرانتر فرۆشن”.
گۆتژی: “ل باژێرێ زاخۆ ئار گه‌هشت بوو 22 هزار دیناران، به‌لێ ئه‌م یێ دووڤچوونێ دكه‌ین، دا كو ئه‌رزانتر بكه‌ین، د نوكه دا كارێ قاچاغیێ ب ئاری دهێته كرن و ژ پارێزگه‌ها دهۆكێ بۆ پارێزگه‌هێن دیتر دهێته ره‌وانه‌كرن، ئه‌ڤه ژی د ده‌مه‌كی دایه ل دووڤ بڕیارا حكومه‌تا هه‌رێمێ نابیت بازرگانی ب ئارێ به‌لاڤكرنێ بهێته كرن، به‌لێ نوكه یێ بوویه كارێ قاچاغ و بازرگانی پێ دهێته كرن”.
ل دوماهیێ گۆت: “ده‌ما ئار دگه‌هیته ده‌ستێ برێكاران، پێدڤی یه د بن چاڤدێریا مه دا بیت و پشكا بریكاری هه‌موو بهێته دانان نه‌كو نیڤه‌كێ بدانیت و نیڤه‌كا دی بۆ كارگه‌هێ بزڤڕینیت”.
