قایمقام و رێڤەبەرێن ناحیان دێ ژ لایێ جڤاتێن پارێزگەھان ھێنە دانان
ئه‌ڤرۆ:
پەرلەمانێ کوردستانێ دێ خواندنا ئێکێ بۆ پرۆژە بریارەکێ کەت و گورەی ڤێ پرۆژە بریارێ قایمقام و رێڤەبەرێن ناحیان دێ ژ لایێ جڤاتێن پارێزگەھان ھێنە دانان.
جێگرێ سەرۆکێ لژنا ناڤخوەی یا پەرلەمانێ کوردستانێ نازم ھەرکی بۆ رۆژناما ئەڤرۆ گۆت بڕیارە رۆژا پێنج شەمبیا بھێت پەرلەمانێ کوردستانێ ل پارێزگەھا ھەلەبجە کۆم ببیت و تێدا گەنگەشە ل سەر پرۆژە قانوونا دانانا سەرۆک و جڤاتا پارێزگەھا ھەلەبجە ھێتەکرن، کو د ھەلبژارتێن بۆری دا ھەلبژارتن بۆ جڤاتا پارێزگەھا ھەلەبجە نەھاتبوو کرن و وی دەمی ھێشتا بڕیارا پارێزگەھبوونێ ب تەمامی دەرنەچوو بوو.
ھەرکی گۆت ژی ھەر د کۆمبوونا رۆژا پێنج شەمبیێ دا، بڕیارە خواندنا ئێکێ بۆ پرۆژە قانوونەکا دی بھێتە کرن بۆ دانانا قایمقام و رێڤەبەرێن ناحیان، کو دێ ب رێیا جڤاتێن پارێزگەھان بیت، بۆ دانانا ھەر قایمقام یان رێڤەبەرێ ناحیێ جڤاتا پارێزگەھێ دێ پێڕابیت و بلند کەت بۆ وەزارەتا نافخۆ و جڤاتا وەزیران، بێی جڤاتێن پارێزگەھان چو کەسەک نابیتە قایمقام و رێڤەبەرێ ناحیێ، ھەروەسا بۆ لادانا وان ژی ب ھەمان شێوە دێ ب رێیا جڤاتێن پارێزگەھا ھێنە لادان، ئەڤە ھەتا وی دەمیە کو ھەلبژارتن بۆ جڤاتێن قەزا و ناحیان دھێنە کرن، ژ بەر کو نوکە ھەلبژارتن نینە دێ ب ڤێ رێیێ ھێنە دانان.
