قستێن پڕۆژەیێن وەبەرهێنانێ ب پارەیێ ئیراقی دێ هێنەدان
هەولێر، قائید میرۆ:
پەیڤدارێ دەستەیا گشتیا وەبەرهێنانێ ل حوكمەتا هەرێما كوردستانێ ئاشكرا كر، د دەمەكێ نێزیك دا دانا قستێن وەبەرهێنانێ ژ دۆلاری دێ بنە دینارێ ئیراقی و هەرێم چاڤەڕێی رێنمایێن بەغدا دكەت ل دۆر دیاركرنا بهایێ دۆلاری هەمبەر پارەیێ ئیراقی.
بەرگەشت ئاكرەیی، پەیڤدارێ دەستەیا گشتیا وەبەرهێنانێ بۆ رۆژناما ئەڤرۆ دیار كر، سەرۆكێ دەستەیا وەبەرهێنانێ ل گەل وەبەرهێنەران كۆمبوویە و بڕیار ل سەر قستێن وەبەرهێنانێ هاتیەدان، كو د دەمەكێ نێزیك دا بڕیار دێ هێتە بەلاڤكرن و گۆت: «ئیدی دانا قستێن وەبەرهێنانێ ژ دۆلاری دێ هێنە گوهۆڕین بۆ دینارێ ئیراقی و قستێن وەبەرهێنانێ ب دۆلاری ناهێنەدان، ل دەمەكێ نێزیك ژی دێ بڕیار كەڤیتە د بیاڤێ بجهئینانێ دا، چونكی ژ بەر گوهۆڕینێن رۆژانە یێن د بهایێ دۆلاری دا روو ددەن، وەلاتی زیاندار دبن».
بەرگەشت ئاكرەیی گۆتژی: «ئەو پارەیێ هاتیە دیاركرن د بەرژەوەندیا وەلاتیان دایە، چونكی سیاسەتا حوكمەتا هەرێما كوردستانێ و سەرۆكێ حوكمەتێ ژی ئەڤەیە، هەر بڕیارەكا بهێتەدان بەرژەوەندیا وەلاتیان بەرچاڤ بهێتە وەرگرتن، نوكە ئەم چاڤەڕێی بەغدا دكەین هەتا بزانین دووماهی رێنمایی و بڕیارێن بەغدا ل دۆر گوهۆڕینا دۆلاری بۆ دینارێ ئیراقی دێ چەندبیت، بەلێ ئەم پشتڕاستین دێ بڕیار د بەرژەوەندیا وەلاتیان دا بیت و زیان ژی بۆ وەبەرهێنەران نابیت».
