قشلا ئاكرێ دێ بیتە مۆزەخانەیەكا كەلەپۆری و سەنتەرەكێ گەشتیاری
رەمەزان زەكەریا
ئاكرێ ئێكە ژ دەڤەرداریێن هەرە كەڤنار ل سەر ئاستێ كوردستانێ و ئیراقێ، خودان دیرۆكەكا دەولەمەند و چەندین جهێن شوونەواری یە، د چارچۆڤەیێ پاراستنا ڤی كلتۆرێ دێرین دا، بزاڤێن بەردەوام دهێنە كرن داكۆ قشلا ئاكرێ بهێتە نووژەنكرن و ببیتە مۆزەخانەیەكا كەلەپۆری و سەردەمیانە.
هیوا شەمال، رێڤەبەرێ شوونەوار و كەلەپۆرێ ئاكرێ بۆ رۆژنامەیا ئەڤرۆ گۆت: هەتا نوكە كارێن باش هاتینە ئەنجامدان و نێزیكی 50% یا پرۆژەیێ نووژەنكرنا قشلێ ب دووماهی هاتیە، پشتی كو ل سالا 2021 بودجەیەك بۆ هاتە تەرخانكرن مەترسیا هەڕفینێ ل سەر ڤێ بناغەیا دیرۆكی نەمایە، بڕیارە هەر دەمێ بودجەیێ دی یێ پێدڤی بهێتە مەزاختن كارێن ماین بهێنە تەمامكرن داكۆ ئەڤ جهە ببیتە مۆزەخانەیەكا كەلەپۆری و گەلەریەكا رۆشنبیری، پەرتووكخانە و قەهوخانەیەكا كەڤنار.
ناڤبری گۆت: ئەڤ پرۆژە نەب تنێ بۆ پاراستنا شوونەوارا نە ئارمانج ژێ راكێشانا گەشتیارانە ب تایبەت گەشتیارێن بیانی داكۆ پتر بەرەێ خۆ بدەنە دەڤەرا ئاكرێ و پاراستنا پارچەیێن شوونەواری چەندین پارچەیێن كەلتۆری و دیرۆكی یێن دەڤەرێ دێ ل ڤێ مۆزەخانەیێ هێنە پاراستن و نیشادان، ڤەكرنا ڤێ مۆزەخانەیێ دێ بیتە ژێدەرەكێ باشێ داهاتی بۆ دەڤەرێ.
دهێتە زانین كو ئاكرێ ل سالا 1877 ب فەرمی بوویە دەڤەرداری، ژبەر وێ چەندێ دروستكرنا مۆزەخانەیەكێ ل ناڤ قشلێ دا دێ رەسەناتی و دیرۆكا باژێڕێ كەڤنار بۆ نڤشێن پاشەرۆژێ و گەشتیاران پارێزیت.
