قه‌یرانا باوه‌ریێ و بازاڕێ هاتوباتێ!
د هه‌ر كاره‌كێ ژیانێ دا، تایبه‌ت كارێن كۆمى و ب هه‌ڤپشكى دهێن ئه‌نجامدان، هه‌كه باوه‌رى د ناڤبه‌را دو ئالییان دا یان ێده‌تر مژداربوو یان نه‌ما، هینگێ پرۆژه‌یێ هه‌ڤپشك ژ قۆناغا براینى و دۆستینیێ به‌ره‌ڤ خانه‌یا دژمنكارى و دژواریێ دچت. به‌هرا بهتر ژى ئه‌ڤه د خزمه‌تا چو ئالییان دا نینه، ژبلى دژمن و نه‌حه‌زێن وان كو به‌رده‌وام كار ل سه‌ر دكن دا كو ئارمانجێن وان ب ده‌ستڤه بهێن.
د درێژیا دیرۆكێ دا باه‌رییه‌كا وسا د ناڤبه‌را كوردان دا و پاشى نه‌یارێن وان دا په‌یدانه‌بوویه كو تاك و جڤاك پشتا خوه پێگه‌رم بكن كو بزاڤا رزگاریخوازییا كوردى دێ كاروانێ خوه به‌ره‌ڤ باشتر هاژۆت و دێ گه‌هت ئارمانجێن خوه یێن ژ ده‌ستداین، ئه‌ڤ ره‌فتاره ژ نه‌خوه‌شیا په‌نجه‌شێرێ كه‌مباختره كو داویێ دبته ئه‌گه‌رێ مرنا خه‌ونان و به‌رده‌وامیا مانا ملله‌ته‌كى نێزیكى 40 ملیۆن مرۆڤان ل دوماهیا كاروانێ پێشكه‌ڤتنێ و بێ ئالا ل ناڤ وه‌لاتێن هه‌ڤگرتى.
هه‌كه ئه‌م ڤان 26 سالێن حوكمدارییا زڕخۆسه‌ر (شبه مستقل) تنێ تۆمار بكین، دێ بینین چو جاران باوه‌رییه‌ك وسا مكوم ل ناڤبه‌را حزبێن كوردى په‌یدانه‌بوویه. واته هه‌ر ده‌م هه‌ر ئێكى مارێ وى دبن كه‌فشیڤه‌یه، نیازا وى ئه‌وه به‌رده‌ته بن پێن برایێ خوه و ب زووترین ده‌م خوه ژێ رزگار بكه‌ت. ژ به‌ر هندێ ئێكه‌مین سه‌ربۆرا نه‌خرى یا هه‌لبژارتنێن حزبێن هه‌رێما كوردستانێ ل بهارا 1992، بوونه ئالۆزى، دوماهیێ نه‌چاربوون كو ب سیسته‌مێ 50-50 چاره بكه‌ن، ئه‌نجامێ وێ ئاگرێ شه‌ڕێ براكوژیێ پشتى هینگێ ب دو سالان هه‌لبوو، په‌رله‌مان ژ كار كه‌ڤت و پتر ژ جاره‌كێ هات داگیر كرن، هه‌تا نها ژى خه‌لكێ مه یێ باجا وێ قۆناغێ ددت و رۆژ بۆ رۆژێ ره‌وش یا یا كامبختر لێ دهێت.
پشتى مالوێرانییه‌كا دوور و درێژ، ب هزاران كوشتى، بریندار و تالاكرن و پێلێنانا مافێ مرۆڤى و… هتد پارتێن كوردى ژ ركا خوه نه‌هاتن خوار و ڤایرۆسێ بێباوه‌ریێ خورتتر لێ هات، هه‌تا ئه‌مریكا فه‌رمانكرى و ل سالا 1998 هه‌ردو ئالیێن شه‌ڕكه‌ر برینه وه‌لاتێ خوه ل ژێر چاڤدێریا وه‌زیرا ده‌رڤه یا ئیدارا ئه‌مریكى ل وى ده‌مى ((مالرین ئۆلبرایت)) پێكهیناین.
راسته ئه‌مریكا ژ بوو پاراستنا به‌رژه‌وه‌ندیێن خوه (پارتى و ئێكه‌تى) ب هۆشدارى پێكئینان، لێ هه‌ر نه‌شیا، ب هه‌ر ئه‌گه‌ره‌كێ هه‌یى باوه‌ریێ د ناڤبه‌را وان دا په‌یدا كت كو ره‌وش وه‌ك جاران بزڤڕت، لێ ب بۆهرینا ده‌مى، هه‌ردو ئالى راده‌ستى دیفاكتۆى ((ئه‌مر الواقع)) بوون، رێكڤتننامه‌یا پێكهاتنێ و حه‌رامكرنا شه‌ڕێ براكوژیێ ئیمزاكر. سه‌ره‌رایى ناكۆكیێن هه‌ین، هه‌تا نها به‌رده‌وامه و دبت هه‌ردو ئه‌گه‌رن كو هه‌تا نها شه‌ره‌كێ دى یێ براكوژیێ روونه‌ده‌ت.
تشتێ به‌رچاڤ چێبووى، دیاره هنده‌ك ده‌نگ هێشتا د دیفاكتۆیێ هه‌یى نه‌گه‌هشتینه كو چو ئالى نكارن ب هێزا له‌شكرى ئالیێ هه‌ڤڕك ژ ناڤببن، ژ به‌ر هندێ ره‌وته‌ك ب ناڤێ ((بزاڤا گۆڕان)) پشتى هینگێ ژ (ى-ن-ك) جودا بوو، ب هه‌ناسه‌یه‌ك ته‌نگ ل سه‌ر نه‌بوونا باوه‌ریێ، هه‌ر مانه د وێ هزرێ دا كو ئه‌و دشێن ئالییه‌كێ ده‌ستهه‌لاتا هه‌رێمێ ل ژێر درووشمێن بریقه‌دار ژ ناڤببن!
ئه‌وا ((گۆڕان)) دزانت، خه‌لكه‌كێ دى ژى دبت ژ وان باشتر دزانن. لێ جودایى ئه‌وه ئه‌و ئالى بهتر د واقعى دگه‌هن و گه‌هشتنه وێ باوه‌ریێ كو نها ده‌ستهه‌لاتا هه‌رێمێ د ده‌ست (پارتى و ئێكه‌تیێ) دایه، سه‌ره‌رایى گه‌نده‌لییا وان و ژه‌نگی بوونا وان لسه‌ر كورسیكا ده‌ستهه‌لاتێ، لێ ئالترناتیڤێ وان نها هه‌ر ئه‌و هه‌ردو ب خوه‌نه، ژ به‌ر كو مه ئه‌و جڤاكێ هشیار و خودان ئیراده نینه ب هه‌ڤڕا رابن و مینا بهارا ئه‌ره‌بى گوهه‌ڕتنان بكن.
واته هنده‌ك جاران مرۆڤ دبێژته یارێ دایێ ژى بابۆ. ده‌مێ نه‌شێت گوهڕینان بكت، باشتره د ڤێ قۆناغێ دا واقعێ هه‌یى قه‌بوول بكن و ب هه‌ر ره‌نگێ هه‌یى باوه‌ریێ په‌یدابكن، دا كو چو به‌هانه‌یان بۆ ده‌ستهه‌لاتێ نه‌هێلن بهتر قه‌یرانان ب قه‌یرانان چاره بكت و دوماهیێ ببنه ((چووچكا ویتویتانى و مالا خوه ژى خراب بكن و یا مه ژى ل ره‌خ دانن))!
