قوتابخانێن سیستەمێ ئینگلیزی ئاریشە بۆ خێزانێن قوتابیان دروستکرینە
ئه‌ڤرۆ نيوز:
ھژمارەکا خێزانێن قوتابیێن قوتابخانا زاب یا بنەرەتی ل دێرەلۆکێ داخوازەک پێشکێشی رێڤەبەریا ناحیا دێرەلۆکێ کریە و تێدا داخوازکریە کو سیستەمێ خواندنا قوتابخانا وان ببیتە کوردی و ھەر ل سەر ڤێ پرسێ ل گەل کارگێریا قوتابخانێ ژی کۆمبوونە.
د داخوازیا خێزانێن وان قوتابیان دا ھاتیە کو ئەڤە چار سالە سیستەمێ خواندنا زارۆیێن وان بوویە ئینگلیزی و ئەڤ چەندە ژی بوویە ئەگەرێ نزمبوونا ئاستێ زانستی ل دەڤ زارۆیێن وان، ھەروەسا نەبوونا مامۆستا و کادرێن زیرەک ب زمانێ ئینگلیزی ل دەڤەرێ بوویە ئەگەرێ ھندێ کو قوتابی ب دروستی فێرنەبیت و ل مال ژی کەس نینە ب دروستی بگەھینتێ ژ بەر ڤێ یەکێ ژی دخوازین کو جارەکا دی سیستەمێ خواندنا وانا ببیتە کوردی.
ژ ئالیێ خوە ڤە سامی ئوشانە، رێڤەبەرێ ناحیا دێرەلۆکێ بۆ رۆژناما ئەڤرۆ دیار کر کو داخوازا خێزانێن ڤان قوتابیان گەھشتیە وان و گۆت: “مە ژی ب نڤیسار قایمقامیا قەزا ئامێدیێ پێ ھایدار کریە بۆ وێ یەکێ رێڤەبەریا پەروەردێ ل سەر ئاریشا وان بھێتە ئاگەھدارکرن کو چارەسەریەکا گونجایێ بھێتە دیتن”.
ناڤھاتی ئاماژە دا وێ چەندێ کو پێدڤیە ماموستایێن زیرەک و کادرێن خودان شیان بۆ ڤان قوتابیان بھێنە پەیداکرن، چونکی مخابنە ئەڤ قوتابخانە ببیتە کوردی ژ بەر کو نوکە زمانێ ئینگلیزی زمانێ سەرەکیە ل ھەموو جیھانێ.