قوتابیه‌كێ محه‌مه‌د عارفێ جزیری نوكه یێ ل رادیۆیا دهۆك
دهۆك، شاكر ئه‌تروشی:
نزار شنگاری، ده‌رهێنه‌رێ به‌رنیاسێ رادیۆیا دهۆك، د دیداره‌كێ دا بۆ رۆژناما ئه‌ڤرۆ ئاشكراكر كو به‌ری ئه‌و بهێته دناڤ وارێ راگه‌هاندنێ دا ساز ده‌ژنی و ب گۆتنا وی نوكه ئه‌و تاكه مۆزیكژه‌نه ل ده‌ڤه‌را به‌هدینان وه‌ك ئه‌ندام ل كومه‌لا مۆزیكژه‌نێن عیراقی كو باره‌گایێ وێ ل به‌غدایه هاتیه وه‌رگرتن.
نزاری گۆت: ل ده‌ستپێكا سالێن هه‌شتێیان وی حه‌ز ژ ژه‌نینا سازێ دكر و پشتی ده‌لیڤه بۆ هاتی چوو خوله‌كا فێركرنێ كو راهێنه‌رێ وێ هونه‌رمه‌ندێ نه‌مر (محه‌مه‌د عارفێ جزیری) بوو گه‌له‌ك كه‌سێن دی ژی ل گه‌ل وی بوون، ژوانا هونه‌رمه‌ند حه‌سه‌ن شه‌ریف.
زێده‌تر گۆت: ل سالا 1984 ئه‌ز چوومه ل گه‌ل تیپا شێخۆ یا هونه‌ری لێ من ل ڤێره عۆد ژه‌نی و ئه‌م چووینه ستۆدیۆیا ته‌له‌فزیوونا مووسل مه سێ ستران بۆ هونه‌رمه‌ند ئیسماعیل جومعه‌ی تۆماركرن و ئه‌و ستران ل كه‌نالێ كه‌ركووك دهاتنه نیشادان، ئه‌ڤه پشكداریا من یا ئێكێ بوو، دووڤدا من ل گه‌ل چه‌ندین سترانبێژێن دی عۆد دژه‌نی، هه‌تا سالا 1988 ئه‌م دبه‌رده‌وام بووین لێ دوێ سالێ دا ئه‌نفال ب سه‌ر مه دا هاتن و هه‌ر ئه‌ندامه‌كێ تیپێ بۆ خوه چوو، پشتی سه‌رهلدانی جاره‌كا دی ئه‌ز زڤریمه ڤه و مه ل گه‌ل سترانبێژ سه‌میر سه‌دیق و حاجی عه‌لی كاركر، هه‌روه‌سا ل گه‌ل چه‌ندین هه‌لبه‌ستڤان من عۆد بۆ ژه‌نیه، ژوانا(برهان زێباری و لائیق كۆرێمه‌ی و شه‌عبان سلێمان و هه‌یفا دۆسكی) و گه‌له‌كێن دی و نوكه ژی ئه‌ز هنده‌ك جاران خۆلێن فێركرنا عودێ ڤه‌دكه‌م.
