قوتابیێن زانكۆیێن دهۆك و زاخۆ دێ هێنه ڤاكسیندان
ئه‌ڤرۆ، عه‌لی و حه‌مۆ:
ب مه‌ره‌ما رێگریكرن ل زێده‌تر به‌لاڤبوونا ڤایرۆسێ كۆرۆنایێ و دروستكرنا به‌رگریا كۆمێ ل دژی كۆرۆنایێ و دانانا ڤاكسینا دژی كۆرۆنایێ بۆ مامۆستا و قوتابیان، قوتابیێن هه‌ردو زانكۆیێن دهۆك و زاخۆ دێ هێنه ڤاكسیندان.
حه‌مزه ره‌زیكی، به‌رپرسێ راگه‌هاندنا رێڤه‌به‌ریا گشتی یا ساخله‌میا پارێزگه‌ها دهۆكێ بۆ رۆژناما ئه‌ڤرۆ گۆت: “ب رێیا تیمێن گه‌رۆك، ئه‌ڤرۆ 9/11/2021 و ل ده‌مژمێر 11:00 سپێدێ ل ناڤه‌ندا قوتابیان دێ ده‌ست ب دانانا ڤاكسینا دژی كۆرۆنایێ كه‌ت”.
ره‌زیكی گۆتژی: “داخوازێ ژ قوتابیان دكه‌ین ناسنامێن خوه ل گه‌ل خوه بینن، داكو راسته‌وخوه بهێنه تۆماركرن و ڤاكسینێ بدانن”.
دیسا د به‌رده‌وامیا ڤه‌كرنا بنگه‌هێن دانانا ڤاكسینا دژی كۆرۆنایێ دا ل ئیداره‌یا سه‌ربخوه یا زاخۆ، بنگه‌هه‌كێ دیتر یێ ڤاكسینێ ل زانكۆیا زاخۆ هاته ڤه‌كرن و ئه‌ڤ سه‌نته‌ره ژی دێ بۆ قوتابیێن زانكۆیێ و خه‌لكێ زاخۆ یێ ته‌رخان كری بیت.
دكتۆر شاكر، رێڤه‌به‌رێ ساخله‌میا زاخۆ بۆ رۆژناما ئه‌ڤرۆ گۆت: ل دووڤ وێ پلانا هاتیه دارێشتن ژلایێ رێڤه‌به‌ریا ساخله‌میا زاخۆ ڤه كو هه‌ژماره‌كا بنگه‌هێن دیترێن دانانا ڤاكسینا دژی كۆرۆنایێ ل ئیداره‌یا سه‌ربخوه یا زاخۆ بهێنه ڤه‌كرن، دوهی 8/11/2021 زانكۆیا زاخۆ ب هه‌ڤكاریا رێڤه‌به‌ریا ساخله‌میا زاخۆ بنگه‌هه‌كێ دانانا ڤاكسینا كۆرۆنایێ ل زانكۆیا زاخۆ ڤه‌كر، ئه‌ڤ بنگه‌هه دێ وه‌كو كه‌مپینه‌كێ بیت د ناڤ زانكۆیا زاخۆ دا كو ب شێوه‌یه‌كێ باش قوتابی ڤاكسینێ بدانن، دیسا ئه‌م داخوازێ ژ قوتابیان دكه‌ین بهێن ڤاكسینێ بدانن”.
