قوتابیێن كۆلیژا ئاكرێ سه‌ره‌دانا ناڤه‌ندا خانی كر
دهۆك، نه‌وزاد هلۆری:
ب مه‌ره‌ما پێشڤه‌برنا ئاستێ زانستیێ وان، دوهی هه‌ژماره‌كا قوتابیێن كۆلیژا په‌روه‌ردا ئاكرێ و پشكا زمانێ كوردی سه‌ره‌دانا ناڤه‌ندا خانی یا ره‌وشه‌نبیری و راگه‌هاندنێ كر و ژلایێ ئێحسان ئامێدی به‌رپرسێ ناڤه‌ندێ و رێڤه‌به‌ر و ستافێ سازیێن خانی هاتنه پێشوازیكرن.
ئێحسان ئامێدی، به‌رپرسێ ناڤه‌ندا خانی یا ره‌وشه‌نبیری و راگه‌هاندنێ ب خێرهاتنا وان كر و گۆت: “ناڤه‌ندا خانی ژ هه‌ژماره‌كا سازیێن جودا د وارێ راگه‌هاندن و ره‌وشه‌نبیریێ دا پێك دهێت و ئێكه ژ ناڤه‌ندێن گرنگ ل كوردستان و پارێزگه‌ها دهۆكێ و خزمه‌ته‌كا به‌رچاڤ د بیاڤێ ره‌وشه‌نبیری و راگه‌هاندنێ دا دكه‌ت، ل ناڤه‌ندا خانی وه‌به‌رهێنانا نووچه و پێزانینان ب شێوازه‌كێ سه‌رده‌میانه و زانستی بۆ خوانده‌ڤان و بینه‌ر و گوهداران دهێته كرن، ئه‌م وه‌كو ناڤه‌ند د خزمه‌ت داینه بۆ هه‌موو خه‌لكێ خوشتڤی و قوتابیێن هێژا”.
غه‌فور عومه‌ر، مامۆستا ل كۆلیژا په‌روه‌ردا ئاكرێ و پشكا زمانێ كوردی بۆ ئه‌ڤرۆ گۆت: “ئه‌م ل كۆلیژێ زێده‌تر ب شێوه‌یێ تیوری وانه‌یان بۆ قوتابیان شرۆڤه دكه‌ین، له‌وا مه خواست كو قوتابیێن خوه بینین سه‌ره‌دانا ناڤه‌ندا خانی بكه‌ن و ژ نێزیك كارێ وان ببینین ب هه‌موو جۆرێن خوه‌ڤه، مینا: تێله‌فزیۆن، رادیۆ، روژنامه و تورێن جڤاكی، ب سوپاسیڤه ستاف و كارمه‌ندێ، ناڤه‌ندێ ب شێوازه‌كێ هه‌ری باش هه‌موو سازی ب هه‌موو پشكێن خوه ڤه بۆ قوتابیان شرۆڤه‌كرن، بۆ قوتابیان ژی رۆهن بوو كا چاوا كار ل ناڤه‌ند و سازیێن راگه‌هاندنێ دهێته كرن”.
