قوتابیێن نوكە
رەمەزان ئیسماعیل گەرەگۆهی
هەر ژ ڕۆژا زارۆك ژ دایك دبیت و دهێتە سەر دونیایێ و هەتا دگەهیتە ژیێ چار سالیێ، ئەركێ خودانكرن و سەخبێری و پەروەردەكرن و ئاراستەكرنا وی هەموو دكەڤیتە سەر ملێن سەمیان و كەس و كارێن خێزانا وی، لەوڕا گەلەك یا پێدڤییە ل ڤێ قووناغێ هەموو كەس و كارێن وی پێكڤـە نەخاسمە دایك و باب، گەلەكێ ژ دەمێ خۆ بدەنێ و باش چاڤێ خو لێبكەن و خەمێ ژێ بخۆن و زەحمەتێ پێڤە ببەن و كەسایەتیەكا باش و بهێز بۆ پەیدابكەن و دەمێ ژیێ وی دگەهیتە چار پێنج سالیێ ژی دێ ل باخچەیێ زارۆكان هێتە تۆماركرن و بو ماوێ ساڵەكێ هەتا دو سالان دێ پشكەكا دەمێ خۆ ل وێرێ بۆرینیت و دێ هندەك پێزانین و شیرەتان ل سەر ئەوێن ل مالێ وەرگرتین زێدەكەت و ئەڤە ژی سەرێ ژۆری یە، چونكی بۆ پێشەڕۆژا وی تشتەكێ باش و ب مفایە، لێ ئەگەر ئەڤ دەلیڤە بۆ هەلنەكەفت و ب دەست نەكەفت و ل باخچەی نەخواند، دێ ئێكسەر ل ژیێ (٦) شەش ساڵیێ پەیوەندیێ ب قوتابخانێ كەت، پێدڤیە ل سێ سالێن دەسپێكێ ژ خەلەكا ئێكێ ژ نەه ساڵێن قووناغا بنەرەت خێزانا زارۆكی و مل ب مل و ب هەماهەنگی دگەل خواندنگەهێ ڕۆلەكێ باش د پەروەردە و فێركرنا وی دا ببینن، چونكی ئەڤ هەرسێ سالە دهێنە هژمارتن كو گرنگترین و هەستیارترین سالێن خواندنێ د ژیێ قوتابی دا و دبنە شەنگستە و بنیات بۆ پێگەهاندن و ئاڤاكرنا وی و باشكرنا شیانێن وی ژ هەر لایەكی ڤە، نەخاسمە فێربوون و زانین و زالبون ب سەر تیپاندا و دورستكرنا بڕگەیان و پەیڤا و هژمار و تێگەهێن بیركاریێ…، لێ ل هەر پۆلەكا قوتابی نەشیا ڕۆلێ خۆ ببینیت و پێشڤەبچیت و بگەهیتە ئاستێ پێدڤی باشتر ئەوە قوتابی بمینیتە ل پولا خۆ و ب هندەك ڕێنما و بڕیار و خاترانا ژ پولا وی بۆ پولەكا دی نەهێتە دەربازكرن، لێ ئەگەر ل هەرسـێ پولێن ئێكێ و دویێ و سێیێ بێی كو ژ هەژی دەرچوونێ بیت و هــاتە دەربازكرن و بڤی ئاستی و ئاوایی و بێ پێشڤەچونەك گەهەشتە پولا چارێ،
ل دوماهیێ دێ ئەو و كەس و كارێن وی گەلەك ئاستەنگیان بینن و ب زەحمەت بشێن قەرەبویا وێ شاشیێ بكەن، وەكی گەلەك قوتابیێن نوكە ژ ئەڤی جۆری هەنە و ل پۆلێن ئێكێ و دویێ و سێیێ هاتینە دەربازكرن و ل پۆلا چارێ دەوامێ دكەن و نزانن چار تیپان بتنێ بنڤیسن و بووینە پشتی و بارگرانی بو خۆ و خێزانا خۆ ژی.
