قوتابی حەز دكەت د ناڤ سەقایەكێ خۆش دا پێشوازی لێ بهێتەكرن
حەسەن رێكانی
پشتی كو بێهنڤەدانا هاڤینێ ب دووماهی هاتی و وەزارەتا پەروەردێ ڕۆژا ئێكشەمبییا 21-9-2025 وەك ئێكەم ڕۆژ بۆ دەستپێكرنا سالا نوی یا خواندنێ دەستنیشانكری قوتابی نەئارامییەك بۆ وی دروست دبیت ژبەر نێزیكبوونا دەوامێ, ژ هەژی گۆتنێیە بێژین كو هەمی دەمان دەستپێك ب سەهم و ترس و نەدخۆشن.
بێهنڤەدانا هاڤینێ ئەو دەمە یێ كو پترییا قوتابییان ژ سەقایێ خواندن و قوتابخانەیێ دویر دكەڤن و بەرەڤ یاری و مژویلاهییێن ڕۆژانەڤە دچن ژ وان ژی (یاریكرن, دەركەڤتن ل گەل هەڤالان, بكارئینانا تێلەفوونێ بۆ مەرەما یارییێن ئەلكترۆنی و هتد), پشكەك ژ وان قوتابییان پشكدار دبن د خۆلێن فێربوون و ب هێزكرنێ دا، ئەڤ پشكە دێ گەلەك مفایی ژ دەمێ خۆ وەرگرن ژ بەركو وان دەمێ خۆ ب تشتێن بێ مفا دەرباس نەكریە و گوهۆڕینەكا باشتر د كەسایەتییا خۆدا كریە.لێ جهێ داخێیە ل گەل نێزیكبوونا ڤەكرنا دەرگەهێن قوتابخانەیان پترییا قوتابییان هەست ب نەئارامی و دلتەنگییێ دكەن ژ بەر كو دێ جارەكا دی زڤرنە ل سەر خواندنێ, لێ یا گرنگە مامۆستا و دەستەیا قوتابخانێ ب گشتی كار بكەن كو سەقایەكێ خۆش و ئارام و ب زەوق بۆ قوتابی دروست بكەن ب تایبەت ئەو قوتابییێن ژ نوی دهێنە وەرگرتن. ل ڤێرێ ئەم دێ بەحسێ قوتابییێن پۆلا ئێكێ كەین ئەم تێبینییا وێ چەندێ دكەین قوتابییێ پۆلا ئێكێ ئێكەم جارە دێ چیتە د ناڤ سەقایەكێ نویدا لەوما ئەو هەست پێ دكەت ئەڤ جهە بۆ وی یێ سەیرە (ئاڤاهی, مامۆستا, قوتابی, پۆل, پێنوس, پەرتووك). ئەو پێدڤی ب ڕەفتار و چالاكییێن تایبەتن كو ببیتە ئەگەرێ ئاڤاكرنا كەسایەتییا وی.
قوتابی حەز دكەت ب جوانترین ڕەنگ پێشوازی ل وی بهێتەكرن.
پێدڤییە مامۆستا خۆ ژ شێوازێن كلاسیك و كەڤن دویر بێخن و شێوازێن نوی بۆ سالا نوی یا خواندنێ بكاربینن بۆ نموونە:
– ب گرنژینڤە پێشوازیێ ل قوتابییان بكەن وی هەست بۆ وان دروست بكەن كو كەسێن گرنگن.
– ب ڤیان و حەزژێكرن ڤە خۆ بۆ قوتابییان بدە نیاسین.
– قوتابییان هان بدە كو بێی شەرمكرن ڤە خۆ بدەنە نیاسین.
– گرنگیێ ب هەمی قوتبیان بدە بێی جوداهی, خۆ ژ پەیڤێن نەخۆش و برینداركەر دویبربێخە.
گەلەك گرنگە ئەگەر ب مۆزیك و سترانێن زارۆكان پێشوازی ل وان بهێتەكرن, دێ گەلەك یا باش ئەگەر دەستەیا قوتابخانێ دابەشكرنا پەرتووكان ل سەر قوتابییان گیرۆ نەكەت و دێ كارەكێ جوان بیت ئەگەر ب دیاری و شیریناهیڤە بیت, داكو قوتابی بێزار نەبن و هەر زوی ل گەل پەرتووكێن خۆ ببنە هەڤال.
