قوناغا نها پێدڤی ب ره‌وشه‌نبیریێ یه
د جڤاكێن شارستانیدا كارێن پێشڤه‌برنێ ب گاڤێن رێكخستی برێڤه دچن د هه‌موو وارێن ژیانا جڤاكی و سیاسیدا، ژ وانا بوارێ ئابووری و ره‌وشه‌نبیری و په‌روه‌ردێ، دابینكرنا مه‌رج و رێكێن ڤان هه‌موو ئالییان ب ڤێكرایی سه‌ده‌مێ سه‌ره‌كی یه بو پێشڤه‌برنا ژیانێ، دوور ژ ڤارێبونێ و هاڤێتنا گاڤێن نه هژمارتی، بێ گومان ئالیێ ره‌وشه‌نبیری هه‌موو ده‌مان جهه‌كێ سه‌ره‌كی دگریت ژ به‌ر ڕوولێ وێ یێ كارتێكه‌ر د ناڤه‌روكا ئارمانج و ئاسویاندا و پاشان ئه‌نجا.
جڤاكێ كوردستانێ یێ لێبورده زوَر گه‌ل و نه‌ته‌وه و ئایین لژێر خیڤه‌تا وی یا به‌رفره‌ه و چارچوڤه‌یێن دستوری و قانونی و ئیداری و ره‌وشه‌نبیری و دسه‌قایه‌كێ ئازاد و ئێمن و سه‌قامگیر دا و رێكێن ژیانا به‌رفره‌ه و ده‌لیڤه‌یێن زانست و زانینێ و پاشان ئافراندنێ و دابینكرنا كاری و ئازادییا گوتن و كارێن سیاسی و ئابووری، وێنه‌یێ جڤاكێ مه و سروشتێ وی ده‌رئه‌نجامێن رێڤه‌به‌ریه‌كا سیاسی یه ژ بو ئه‌و هێزێن نهو د گوره‌پانێ دا لسه‌ر بنه‌مایه‌كێ موكم، ل سه‌رده‌مێ نهو ئه‌م خوه دبینین ل هه‌مبه‌ر كه‌تواره‌كێ بێ سنور و ناسنامه‌یێن ژێك جودا، ئه‌وێ حه‌زا یه‌كبونا كوردستانێ هه‌ی و خوه‌جهكرنا بنه‌مایێن ئاشتیێ و پێكڤه‌ژیانێ، پێویسه ل سه‌ر وی یێ هاروكار بیت و یێ به‌شدار بیت دكارێن گرێدای به‌رژه‌وه‌ندییا وه‌لاتی پێخه‌مه‌ت گه‌هشتنا ئارمانجێن چاڤه‌رێكری، ئیك هه‌لوه‌ست و ئێكرێزی و پێگیریكرن ب ئێكبونا كوردستانێ و ره‌وشه‌نبیری پێویستییه‌كا فه‌ره بهێته په‌یڕه‌و كرن پێخه‌مه‌ت پاراستنا ئاسایش و ڕیبڕوبونا ئاسته‌نگێن پاشه‌روژێ.
ئه‌و هێزێن نهو ده‌ستهه‌لاتداریا كوردستانێ دكه‌ن قوناغێن دوور و نشیڤی و ئه‌ڤرازی ده‌رباز كرینه و توشی گه‌له‌ك ئاسته‌نگان بوینه تا گه‌هشتینه قوناغا نهو. تێككاركرنا ره‌وشه‌نبیریا ئه‌رێنی دڤی ده‌میدا و ب تایبه‌ت پشتی ئێكانه‌كرنا گوتارا سیاسی دناڤبه‌را لایه‌نێن كوردستانێ و پێكئینانا ده‌ستهه‌لاته‌كا ئێكگرتی كاره‌كی زوَر گرنگ و فه‌ره، پێدڤییه لایه‌نێن ره‌وشه‌نبیری یێن نه‌ته‌وه‌یی و دیموكراتی ل كوردستانێ د هه‌موو كاوداناندا و ژدانا گه‌لێ خوه بن، ژ به‌ركو هه‌ر ئه‌و د كاودانێن به‌رته‌نگدا بارێ گه‌لێ خوه ل به‌ر چاڤ وه‌ردگرن. گاڤێن ده‌ستپێكێ درێیا بدستڤه ئینانا ره‌وشه‌نبیری و ره‌وشه‌نبیران دناڤا جڤاكێ كوردستانێ دا، پتر هه‌ڤناسی و دانوستاندن و رێكخستنه دناڤا پێكهاته و ده‌زگه‌ه و ئه‌و كه‌سانێن كارێ ره‌وشه‌نبیریا شارستانی دكه‌ن، هه‌ماهه‌نگی دناڤبه‌را ده‌زگه‌هێن فه‌رمیدا زوَر یا گرنگه و ب تایبه‌تی دگه‌ل وه‌زاروتا ره‌وشه‌نبیری و خاندنا بلند و وه‌زاره‌تا وه‌رزش و لاوان و زانكویێن كوردستانێ و میدیایان، بجهكرنا ڤان هه‌موو كاران دكه‌ڤیته ل سه‌ر مللێن مه هه‌موویان.
