قوناغێن داهاتی دێ ل سەر هەرێما كوردستانێ دژوار بن
هەولێر، قائید میرۆ
شارەزایەكی دیاركر، بەغدا یاریا ب دەمی دكەت و دەركرنا بڕیارێن دادگەها فیدڕال دەستپێكا دەركرنا بڕیارانە دژی هەرێما كوردستانێ و پێشبینی دهێتەكرن بڕیارێن دژوارتر ژی بهێنە دەركرن. هەروەسا دبێژیت: ئەگەر وەلاتەكێ ئیقلیمی ل پشت حوكمەتا ئیراقێ و دادگەهێ نەبیت، ئیراقێ ئەو شیان نینە دژی هەرێما كوردستانێ هندەك بڕیاران دەر بكەت.
د. نەوزاد عەزیز، سەرۆكێ رێكخراوا دووربین بۆ رۆژناما ئەڤرۆ دیاركر «ئەو رێكارێن دژی هەرێما كوردستانێ هەین و بڕیارێن دادگەها فیدڕال كەس و لایەنێن سیاسی ل پشتن و ئەگەر بڕیار سیاسی نەبن، دێ چاوا د دەمێ ئێك هەیڤدا هەموو فەرمانبەر و كەسێن مووچە هەیە كو هژمارا یەك ملیۆن و 200 هزار كەسن كارتا بانكی و هژمارا بانكی چێكەن، ئەڤە ب دیتنا من ترانەكرنە بۆ خەلك و فەرمانبەرێن هەرێما كوردستانێ، ئەڤە دەستپێكا دەركرنا بڕیارانە ل دژی هەرێما كوردستانێ و مەترسی هەیە بڕیارێن دژوارتر ژی دژی هەرێما كوردستانێ بهێنە دەركرن».
زێدەتر گۆت: ئەز دوور نابینم ئەو هەڤیرە هێشتا ئاڤێ ڤەخۆت و بڕیار دژی بەرپرسێن هەرێمێ ژی بهێنە دەركرن، ئەگەر دەستێ وان بچیت و بشێن دێ گەشتێن دەرڤە ژی ل خەلكەكی هێنە قەدەغەكرن، هەر چەندە رەوش یا دژوارە، بەلێ ئەز نابینم زۆر ڤەكێشیت و دێ سنورەك بۆ ڤان بڕیاران هێتە دانان، ڤێجا چ خەلكێ كوردستانێ رابیت دەست ب خۆنیشاندانان بكەت، یان ژی ئەمریكا و هەڤپەیمان هەلویستەكی وەربگرن.
خویاژی كر، هەتا سەرۆك كۆمارێ ئیراقێ ژی دەستهەلات هەنە رێگریێ ل هندەك بڕیاران بكەت هەتا بڕیارێن دادگەها فیدڕالی ژی بن، چونكە ئەگەر كار ب ڤی دەست و داری بچیت، دبیت بێژن حوكمەتا هەرێما كوردستانێ ژی شەرعیەت نینە، بەری نوكە هندەك بڕیار هاتنەدان و ژلایێ سەرۆك وەزیرێن ئیراقێ نەهاتنە بجهئینان دشێن هندەك رێیێن دی ڤەبینن بۆ ڤێ چەندێ ڤان بڕِیارا وەكی خوە بجه نەئینن.
د. نەوزاد عەزیز ئاماژەكر» بەرەیێ مقاومە یێ كار دكەت بۆ جوداكرنا پارێزگەها سلێمانیێ ژ هەرێما كوردستانێ و پیلان وەسایە سلێمانی ژی بكەڤیتە سەر كەركووكێ و ل دووماهیێ هەرێمەك بهێتە ئاڤاكرن ل گۆرەی سیاسەت و خواستا بەرەیێ مقاومەبیت ل ئیراقێ، ئەز چاڤەڕێی هەموو بڕیارەكا خراپ ل دادگەها فیدڕال دكەم، ژبەركو چەندین رێكەفتن هەنە دناڤبەرا هەرێم و بەغدا پشتی بڕیارێن دادگەها فیدڕال دەمێ وان رێكەفتنا ژی بسەرڤەچوویە، بۆ نموونە وەزیرا داراییا ئیراقێ داخوازا لیستا فەرمانبەرێن هەرێمێ كریە، بەلێ پرسیار ئەڤە دێ وەزیرا دارایی شیان هەبن داخوازا لیستا چەكدارێن حەشدا شەعبی بكەت.
ئەو یەك ژی گۆت: د دەمەكی دا ئەو هێزێن میلیشیا ل دەرڤەی قانوونێ هاتینە دامەزراندن، ئیراق یاریا ب دەمی دكەت و یا گڤاشتنان ل سەر خەلكێ هەرێما كوردستانێ دكەن، وەلاتیێن هەرێمێ هەستا نەتەوەیی و نیشتیمانی نەمینیت و خەلك بهێتە سەر جادەیان تنێ داخوازا مووچەی بكەن، ئەز یێ پشتڕاستم ئەگەر وەلاتەكێ جیران و ئیقلیمی ل پشت نەبیت دادگەها فیدڕال و حوكمەتا ئیراقێ شیانێن دەركرنا وان بڕیاران نینە دژی هەرێما كوردستانێ، ئەو بڕیار ژلایێ سیاسی ل هەرێما كوردستانێ ناچنە بیاڤێ بجهئینانێ دا، ب تنێ ژلایێ ئابووری ڤە دێ كارتێكرن ل سەر هەرێما كوردستانێ هەبیت.
