قووناغا ئێكێ یا هێلا شەمەندەفڕێ دێ كەڤیتە د بیاڤێ بجهئینانێ دا
هەولێر، قائید میرۆ:
وەزیرێ ئاڤەدانكرن و ئاكنجیكرنێ ل حوكمەتا هەرێما كوردستانێ دیار كر، د دەمەكێ نێزیك دا دێ قووناغا ئێكێ یا راكێشانا هێلا شەمەندەفڕێ كەڤیتە د بیاڤێ بجهئینانێ دا و دبێژیت: دیزاین دێ بۆ پڕۆژەی هێتە دەستپێكرن، پڕۆژەیێ هێلا شەمەندەفڕێ ژبلی هەرێما كوردستانێ دێ كاریگەری ل سەر ئیراقێ و وەلاتێن دەوروبەر ژی هەبیت.
دانا عەبدولكەریم، وەزیرێ ئاڤەدانكرنێ گۆت: «پشتی راگەهاندنا ڤەكۆلینێن ئابووری ل دۆر پڕۆژێ هێلا شەمەندەفڕێ دێ دەست ب قووناغا ئێكێ یا پڕۆژەی هێتە كرن، ئەو ژی دیزاینێ پڕۆژێ هێلا شەمەندەفڕێیە ل هەرێما كوردستانێ، د دەمەكێ نێزیك دا دێ پڕۆژە هێتە دەستپێكرن و هەر قووناغەكا بهێتە دیزاینكرن ئێكسەر دێ هێتە بجهئینان ژی، بڕیارە پڕۆژە بۆ دەمێ پێنج هەتا شەش سالان ب دووماهی بهێت و ب ئێكجاری بكەڤیتە كاری».
دانا عەبدولكەریم گۆتژی: «ئەڤی پڕۆژەی دێ كاریگەری ل سەر ئیراقێ و وەلاتێن دەوروبەر ژی هەبیت، چونكی دەرگەهێ ئیبراهیم خەلیل دێ ب خلا سنووریا پەروێزخان ڤە هێتە گرێدان، دێ بیتە رێیەكا بازرگانیا ستراتیژی، چونكی رێیا كەركووكێ و مووسلێ و هەموو پارێزگەهێن ئیراقێ دێ پێكڤە هێنە گرێدان، كو د پاشەرۆژێ دا دێ گرنگیا خوە د چەندین بیاڤان دا هەبیت، ب تایبەتی بۆ لایەنێ بازرگانی و هاتنوچوونا وەلاتیان».
