قۆربانى مه‌ڵاى ببن
“بۆ مه‌ڵا سامانێ چه‌مچه‌ماڵى”
محه‌مه‌د چه‌لكى
مامێ عه‌لۆ هێشتا چه‌ند پێنگاڤه‌كا ژ مزگه‌فتێ دوور نه‌كه‌فتى، ده‌ما ڕاستى ئه‌فه‌ندیه‌كى هاتى و ئیكسه‌ر وى ئه‌فه‌ندى بارانه‌كا پرسیارێن بتیفكل لێ باراندن، بێی كو سلاڤ خۆشیه‌كێ لێبكه‌ت و گۆتێ:
– ها مامێ عه‌لۆ مه‌ڵاى ڤێجارێ چتۆڤ شه‌ركره‌ك شكاند؟
– به‌رى هه‌ر تشتى جارێ فێرى تۆڕه‌ى ببه، پاشى كا چ دبن هنگلێن ته‌ڤه هه‌یه، بێژه!
– ببووره .. تۆ شیایه من ..
– ئێ .. بێژه.
– مه‌ڵاى چتۆڤ شه‌كره‌ك شكاند؟
– ئه‌ز چه‌ند ژ ئه‌فه‌ندیاى تۆڕه‌مه، هند ژ مه‌ڵایێن ڤێ كوردستانێ!
– مه وه‌كو ئێك لێ نه‌كه؟
– باوه‌ر بكه هوون وه‌كو ئێكن، به‌لێ دبیت هوون پیچه‌كێ ژ وان دقه‌نجتر بن.
– ئانكو ته ژى هه‌ست بڤێ جوداهیێ كریه؟
– جوداهیا چ؟
– جودهییا د ناڤبه‌را ئه‌فه‌ندى و مه‌ڵان دا.
– كورت و كرمانج هوون هه‌موو بقوربانى مه‌ڵا سامانێ چه‌مچه‌ماڵى ببن!
– وه‌نه‌كه ئه‌ز پیڤازا مه‌ڵایێن كوردستانێ سپى بكه‌م! هه‌ر ژ رۆژا هه‌سپێن ته‌له رووتێن بیابانێ گه‌هه‌شتین ڤێرێ و هه‌تا ئه‌ڤرۆ ..
– مامۆ ژ كه‌ره‌ما خوه نه‌كه‌ڤه دووڤ ده‌وسا هرچێ، بكوردى دبێژن: ” نان ئه‌و نانه، ئه‌مرۆ له‌خوانه”. ئه‌گه‌ر لاپه‌رێن دیرۆكێ ڤه‌ده‌ین، دێ گه‌له‌ك ناڤێن مه‌زن یێن ئه‌م شانازیێ پێ دبه‌ین، دێ ده‌ركه‌ڤن ژ “لاوێ په‌ریخانێ” روو ڕه‌شتر.
– تۆ یێ ژ به‌رسڤدانێ دڕه‌ڤى!
– به‌رسڤێن چ؟
– مه‌ڵاى چتۆڤ شه‌كره‌ك شكاند؟
– ئها .. ما دێ چ بێژت؟ یا هه‌ر رۆژه، شیره‌ت و نه‌فره‌تێن لكه‌سێن ژ رێكا خودێ ده‌ركه‌فتى.
– یێن ژ رێكا خودێ ده‌ركه‌فتى كینه!
– هنده‌كێن وه‌كو ته و ئه‌ردۆغانى و مه‌ڵا عه‌لیێ نه قه‌ره‌داغى ..
– بۆ ئه‌ردۆغانى ئه‌ز چ نابێژم، مانێ جامێرى هه‌رسێ ته‌لاقێن خوه یێن هاڤێتین، هه‌ر ستاتۆیه‌كا كوردى خوه ل سه‌ر بانێ هه‌یڤێ بیت، دێ شه‌رێ ژناڤبرنا وێ كه‌ت، به‌س ئه‌ز د مه‌ڵایێ قه‌ره‌داغى ناگه‌هم، بۆچى هنده دوژمنێ گه‌لێ خوه‌یه، پاى شیر حه‌رامه ..
– ما ئه‌و تنێى شیر حه‌رامه!
– مامێ عه‌لۆ لڤى وه‌لاتى شیر حه‌رام هند دمشه‌نه بره‌نگه‌ك وه‌سا، ئێدى یا بزه‌حمه‌ته تۆ شیر حه‌لاله‌كى ناس بكى، له‌وما ئه‌م گه‌هشتینه ئه‌ڤێ رۆژێ، كوشتنا مه بئایه‌تێن قۆرئانێ دئێته حه‌لالكرن و مه‌ڵایێن مه دبێده‌نگن!
– به‌رى نوكه من گۆت: لاپه‌رێن دیرۆكێ ڤه‌نه‌ده، دا ئه‌ز و تۆ نه‌به‌زینه ئێك، مه‌ڵایێن به‌رێ تێ نه، یێن دى هه‌موو قۆربانى پێلاڤا مه‌ڵا سامانێ چه‌مچه‌ماڵى ببن.
– خوه یێ به‌رى نوكه ته نڤێژ لپشت كرى ژى؟
– به‌رى هه‌موویا ئه‌و ..
– ما وى مه‌ڵاى چ گۆتیه؟
– یا ئه‌حمه‌دى خانى گۆتى.
– ئانكو بانگا ئێكگرتنا كوردان دایه؟
– به‌لێ ..
– به‌س كى دى ببانگێ وى نڤێژێ كه‌ت؟
– دێ هه‌ر هنده‌ك هه‌بن!
27.01.2018
