قۆناغا زارۆكینیێ كاریگەری ل سەر كەسایەتیا مرۆڤی هەیە
هەولێر، قائید میرۆ:
شارەزایەكا پەروەردێ دیار كر كو، قۆناغا زارۆكینیێ كاریگەری ل سەر كەسایەتیا مرۆڤی هەیە و پێدڤیە سیستەمەكێ پەروەردێ یێ پێشكەفتی و ئێكگرتی بهێتە بجهئینان بۆ ئاڤاكرنا كەسایەتیا تاكی و قوتابخانە و خێزان پێكڤە كار بكەن، ژبەركو ئەو ژینگەها مرۆڤ تێدا دژیت كارتێكرن ل سەر كەسایەتیا مرۆڤی هەیە.
رەهێل دزەیی، شارەزایا جڤاكی و پەروەردێ بۆ رۆژناما ئەڤرۆ دیار كر، كەسایەتیا مرۆڤی پێك هاتیە ژ كومەكا بۆچوون و هزر و حەزێن مرۆڤی هەر ئەڤە مرۆڤەكێ جودا دكەت ژ مرۆڤەكێ دی، كەسایەتیا مرۆڤی بەردەوام لڤین و بزاڤان دكەت ب مەرەما پاراستنا هەڤسەنگیێ دناڤبەرا حەزێن مرۆڤی و سرۆشت و یاسایێن جڤاكێ كو هاتینە سەپاندن ل سەر و گۆت: پێناسەكرنا كەسایەتیێ كارەكێ ب ساناهی نینە هەتا ژلایێ زانایان ژی، چونكە زۆر لایەنێن گرنگ یێن كەسایەتی و رەفتارێن مرۆڤی نەهاتینە زانین و هۆكار دیار نینن.
رەهێل دیار كر ژی، د ناڤ هەموو زیندەوەرێن سەر ئەردی تنێ مرۆڤی كەسایەتی هەیە، ئەگەر ژی زۆرن بۆ دروست كرنا كەسایەتیا مرۆڤی، زانایێن بیاڤێ دەرونناسیێ و جڤاكناسا بۆچوونێن جودا هەنە ل سەر ئەگەرێن دروست كرنا كەسایەتیا مرۆڤی و كا كیژ ئەگەرن زۆر كاریگەری هەیە ل سەر ئاڤاكرنا كەسایەتیا مرۆڤی، هندەك ئەگەر هەنە پڕانیا زانایان هەڤڕانە ئانكو ئێك بۆچوون ل سەر هەیە ئەو ژی ئەگەرێ بایولۆجی و جڤاكیە، چونكە ئەگەرێ جڤاكی و ئەو ژینگەها مرۆڤ تێدا دژیت كاریگەریێن زێدەتر هەنە ل سەر دروستكرنا كەسایەتیا مرۆڤی و گۆت: بەلێ د هەمان دەمدا ئەگەرێن بایولۆجی ژی كاریگەری ل سەر رەفتارێن مرۆڤی و كێم و زێدەهیا رژێنێن لەشێ مرۆڤی كاریگەری دێ هەبن ل سەر هێمنی و تۆرەیی و بێهێزی و زیرەكیا مرۆڤی، ل گەل ڤێ چەندێ ژی دەوروبەرێن مرۆڤی دشێن ب رێژەیەكا زۆر ل ئەڤان كاریگەریان كێم بكەن.
شارەزایا جڤاكی و پەروەردێ رەهێل دزەیی د بەردەوامیا ئاخفتنێن خۆدا ئاماژە پێ كر كو جڤاكی و خێزانێ كاریگەریێن سەرەكی هەنە ل سەر دروست كرنا كەسایەتیا مرۆڤی، لەوڕا ژی هەكە مە بڤێت ببینە خودان جڤاكەكێ ساخلەم تاكێن ناڤا جڤاكی كەسایەتیێن بهێز بن گرنگە دوور بن ژ توندۆتیژیێ و كەسێن سەركەفتی و كاریگەر بن و گۆت: مخابن سیستەمێ پەروەردە و فێركرنێ ل هەرێما كوردستانێ كەرتێ پەروەردێ و ئاڤاكرنا كەسایەتیا مرۆڤی پشتگوه هاڤێتیە، هەروەكو ئاڤاكرنا كەسایەتیا تاكی ئەركێ پەروەردێ نینە، پڕانیا وەلاتێن پێشكەفتی ل سەر ڤێ چەندێ هەڤڕانە كو پەروەردە بەری فێركرنێ دبێت، ئەڤە ژی بوویە ئەگەر بگەهنە ئاستەكێ بلند یێ پێشكەفتنێ د هەموو بیاڤاندا.
رەهێلێ دیار كر كو پێدڤیە كار بهێتە كرن ژبۆ دانانا سیستەمەكێ پەروەردێ یێ سەردەمیانە كو ل گەل پێشكەفتنێن ئەڤرۆ یێن جیهانێ بگونجیت، قۆناغا زارۆكینیێ كاریگەریێن دوم درێژ ل سەر كەسایەتیا تاكی هەیە، هەرچەند یێ سەركەفتی بیت و داهێنان هەبن و پلەیێن بلند ب دەستڤە ئینابن نەشێت رزگار بیت ژ روودانێن ل سەر دەمێ زارۆكینیێ ب سەردا هاتین و گۆت: لەوڕا ژی قۆناغا زارۆكینیێ یا گرنگە بۆ ئاڤاكرنا كەسایەتیا مرۆڤی، ئەركێ دەستهەلاتێ یە ب رێیا بەرهەڤكرنا سیستەمەكێ پەروەردێ یێ هەڤچەرخ و شێوازەكێ ئێكگرتی یێ پەروەردێ بهێتە بجهئینان، قوتابخانە و خێزان پێكڤە د هاریكار بن ب مەرەما پێشكێشكرنا پەروەردەیەكا ئێكگرتی و ژینگەهەكا هێمن و تەنا دووربین ژ توندۆتیژیێ بۆ زارۆكان بەرهەڤ بكەن.
