قێركرنا جادەێن بازاڕی
عەبدولرەحمان بامەڕنی
قێركرنا جادەێن بازارێ دهۆكێ، دێ جوانیەكێ و پاقژیەكێ دەنە سەروسیمایێ بازاری هەمییێ و دێ ئەڤ جوانییە یا بەردەوام بیت. هێشتا من ئاخفتنا خوە تەمام نەكری، كو مە سێ هەڤالان دناڤ پاركا نەورۆزدا پیاسەدكر، هەڤالەكێ مە گوت: ئەرێ تو بێژی خەلك ڤێ پاقژیێ، دگەل ڤی سەروسیمایێ نوی یێ بازاری راگریت؟. مەبەستا هەڤالێ من، ئەڤ گوهۆڕینێن نوكە ل بازاری دهێنەكرن بوو، شوستە و بەردەرێ دكانان هەمی بوونە ئێك قیاس و ب تابۆكێ هاتنە رازاندن، ددەمەكیدا هەر دكاندارەكی ب كەیفا خوە، هندەكان (سیرامیك) دانابوو و بلندی و نزمی ل هندەك جهێن دی هەبوو و هندەكان ژی زێدەگاڤی ل سەر شوستەیی كربوون، لێ نوكە جوداتر، دیمەنەكێ شارستانی ب بازارێ دهۆكێ هاتیەدان و تایبەت ژی نوكە هەردوو جادەێن سەرەكی یێن ناڤ بازارێ دهۆكێ، یێن دهێنە قێركرن و هەكو ب كوردەواری دبێژین (بازار دێ كەڤلێ خوە گوهۆڕیت).
من گۆتە هەڤالێ خوە، مانێ نوكە ئەم یێ دناڤا پاركا نەوروزدا پیاسێ دكەین، ئەرێ تە تێبینیا گلێشەكی كرییە ل بەر پێن خوە؟ هەڤالێ من دوبارە ل دوور خوە زڤری و بەرێخۆ دا دەردوورێن خوە و هەر وەكو ڤییا ئاخفتنا من تەئكید بكەت و گۆت نەخێر.
من گۆتێ نڤیسەرێ ب ناڤ و دەنگێ رۆسی (تولستوی) گۆتنەكا گەلەك جوان یا هەی و دبێژیت (مرۆڤێ پاقژ ب هشیاری دناڤ جهێن پیسدا دەرباز دبیت، لێ دەما پیساتیێ دبینیت و پێلاڤا وی پیس دبیت، هشیاریا وی كێمترلێدهێت، لێ دەما دبینیت كو پێلاڤێن هەمیان دپیسن، ئێدی ئەو هشیاریە ژی ل دەف نامینیت و پێنگاڤێن خوە دهاڤێژیت) ئەڤ گۆتنە ل سەر ڤێ پاركێ دهێت و دێ ل سەر گوهۆڕینێن نوكە ل بازاری ژی دهێنەكرنێ دهێت.
نوكە ئەم یێ ل پاركێ و ئەم گلێشی نابینین و هەمی پاقژییە، هەكە مە گلێشەك هەبیت ژی ئەم ژی ناهاڤێژینە بەرپێن خوە،ل ڤان گوهۆڕینێن بازاری ژی وەسا هەكە كەسەكێ زێدەگاڤی ل سەر شوستەیان نەكر، پاقژی راگرتن، هەكە چ دكانداران زێدەگاڤی نەكرن، باوەربكە بازار دێ وەكی قودیكا رۆناهیێ مینیت، تو گلێشی لێ نابینی و بازارێ دهۆكێ دێ بیتە جوانترین و پاقژترین بازار.
