قێریێن زارۆیێن رۆژئاڤا نهعلهتان ل مرۆڤایهتیێ دكهن
رهمهزان نسردین كێڤلى
مرۆڤى زۆر وهزیفهت د ژیانێ دا ههنه و بهشهكێ ئهڤان وهزیفهتان، تێكهلى كارێن فهرمى و گشتى دبن, بهلێ گهلهك فهیلهسۆف و بیرمهندان د قووناغێن جودا جودا دا درندهیى یا مرۆڤى دایه دیاركرن، ههكه ئهم ل مێژوویێ بزڤرین مرۆڤان ئهڤ ئاخه تهژى خوین كریه، ژیان ههمى كریه كهربوكین و ل سهر ئاستێ دهولهتان ژى كو نوخبهیێن سیاسى رۆلهكێ كاریگهر د ههمى وارهكى دا ههیه دا ڤهرێژا توندرهویا مرۆڤان دیار دبیت، پهنابرن بۆ دارێشتنا مافێن مرۆڤى و دانانا قانوونێن نیڤدهولهتى ههمى ژبهر هندێ بووینه كو رێگریێ ل كارێن چهپهل یێن مرۆڤان بگرن بهلێ گهلهك ژ ئهڤان و یاسا و رێسایان، یانژى یاداشانامه و بهلگهنامێن گرێدایى مافێ مرۆڤى، ب دیتنا من بیدعهكا نه مرۆڤایهتى یه بۆ ڤهشارتنا رویێ توندرهیێ مرۆڤان.
ژ سالا (2011) و تا نوكه ل وهلاتێ سووریێ ههمى یاسایهكا سروشتى و نیڤ دهولهتى و ناڤخوهیى هاتینه بنپێكرن نێزیك سهد هزار مرۆڤان بووینه قوربانى و یاریان ب كلۆخێن سهرێ مرۆڤان دهێتهكرن، جڤاكى نیڤدهولهتى و نهتهوهیێن ئێكگرتى ههمى شهرمزارن بهرامبهرى ڤان قوربانیان، بهلكو دو وهلات بۆ بهرژهوهندیێن خوه و ناكۆكیێن خوه یێن مێژویێ، یاریان ب چارهنڤێسێ مللهتان دكهن و ههر جار ب ناڤهكى بهرهلایهكا نیڤدهولهتى و ههرێمایهتى دخولقینن بۆ هندێ شهرێن ب وهكالهت و بازرگانیا چهكى زێدهتر بكهن و بهرژهوهندیێن خوه پێ بپارێزن.
ل سهردهمێ گلۆبالیزمێ و پێشكهفتنێن دونیایێ و بهرامبهرى جڤاتا ئیمناهیێ زاۆریێن كوردان یێن دهێنه سهربركرن سۆتن، كوشتن دهربهدهركرن، بهلكو پاشمایێن دهولهتا عوسمانى شانازیێ ژى ب ئهڤان رهفتاران دبهن و ب تیرۆرست ل قهلهمددهن، بهلێ مرۆڤایهتى ب ههمى پیرۆزیێن خوهڤه دهێته نهعلهتبارانكرن، دیسا بێدهنگیا كۆمهلكوژیا كوردان ل سهر دهستێ توركێن ڤاشت یا دبیته بۆیهرهك تهنها چهند نڤێسهرهك یێن ل سهر دنڤێسن.
قێریێن زارۆیێن كوردان گوهێن وان یێن كهڕ تژى قێرى كرین، لێ وژدانا مرۆڤایهتیێ شهرم ژخوه دكهت، ئهرێ گهلۆ مانه دهمه ئێدى ئهم كورد ژ ئهڤێ خهوا گران رابین و ههمى جیاوازیێن خوه بدهینه ئالهكى، دوژمنێ مه جیاوازى د ناڤبهرا مهدا دروستكریه ب كوشتن و ئهنفالكرن و كێمابارانكرنێ بۆچى ئهم جیاوازیێ د ناڤبهرا خوهدا دكهین، ما نهدهمه ههستیكێن مه ب روحهكا نهتهوهیى زیندى ببنهڤه و مزگینیا ئێكگرتنێ بدهنه مه.
هیچ قانوونهكا نیڤدهولهتى نینه رێ بدهته توركان ئاخا وهلاتهكى داگیر بكهت، لێ بهرژهوهندى و هێزا وان، ئهڤێ رێیێ ددهته وان، مانه دهمه ئهم ژى ل بهرژهوهندیێن خوه بگهرین و هێزا خوه بكهینه ئێك، بۆچى مه ب ههبوونا توركهك یان سووریهك خۆشه كو زۆریێ ل مه بكهت، لێ مه ب ههبوونا كوردهكى خۆش نینه ئیدارا مه بكهت.
ل دووماهیا ڤێ گۆتارێ دبیت هندهك هزر بكهنن ئهز زورێ ئێشایم كو پتریا گۆتنێن من ئاراستهكرینه بۆ عاتیفا مرۆڤێ كورد، بهلێ ب د ههمان دهم دا، ئهو پرسێن من كرین ههه ئهم ب لۆژیكێ سیاسى كارنهكهین ئێدى ئهم دێ بینه پاریهكێ ب ساناهى بۆ ههمى دوژمنان، لهورا ئهو یێ مه ب ناڤێ سۆرهتێن (ئهنفال و فهتح و نهصر) دخاپینن، مانه دهمه ئهم بهرسڤا وان بدهین و ژ ئهڤێ خهوا بن دهستیێ رابین؟!..
