قەرێن بچووك و ناڤنجی بۆ دەرچوویێن گەشتوگوزارێ دێ هێنەدان
ئەڤرۆ
هەولێر، قائید میرۆ:
دەستەیا گەشتوگوزارێ راگەهاند: هەر كەسەكێ پڕۆژەكێ گەشتیاری ئەنجام بدەت دێ ژ قەرێ بانكا ناڤەندی مفادار بیت و دبێژیت: رێنمایی بۆ دانا قەرێ گەشتوگوزارێ دێ هێنە دەركرن.
سیروان تۆفیق، رێڤەبەرێ بازاڕكرنێ ل دەستەیا گەشتوگوزارێ بۆ رۆژناما ئەڤرۆ دیار كر، د چارچوڤێ پلانا حوكمەتا هەرێما كوردستانێ دا بۆ ڤەدیتنا دەلیڤێن كاری بۆ گەنجان، بڕیارە قەرێن بچووك و ناڤنجی ب دەرچوویێن پشكا گەشتوگوزارێ بهێنەدان و گۆت: «هەر كەسەكێ ل بەر بیت پڕۆژەكێ گەشتیاری یێ بچووك ئەنجام بدەت، ل گورەی رێنمایان دێ ژ قەرێ گەشتیاری مفادار بیت، دیسا هەر وەلاتیەكێ پڕۆژەكێ گەشتیاری هەبیت، دشێت ژ وەرگرتنا ڤی قەری مفادار بیت».
سیروان تۆفیق گۆتژی: «ب رێیا بانكا ناڤەندیا ئیراقێ، ئەو قەڕە ل سەر دەرچوویێن گەشتیاری دێ هێتە بەلاڤكرن، مە داخواز كریە بانكا ناڤەندی رێنمایان بدەتە بانكا هەرێمێ بۆ ڤێ چەندێ دەست ب دانا قەران بهێتە كرن، بەلێ هەتا نوكە دیار نینە دێ گوژمێ قەرێ بانكا ناڤەندی چەندبیت، چونكی مە ب رێیا نوونەرایەتیا حوكمەتا هەرێما كوردستانێ داخواز ژ بانكا ناڤەندی كریە رێنمایان بۆ كەسێن مفادار دبن؛ دەربكەت».
