قەسرا كەسایەتیەكێ دهۆكێ بوو جهەكێ كلتۆری
شاكر ئەتروشی:
قەسرا شێخی، ئەوا د سالێن چلان هەتا پێنجیان دا ل تاخێ مەزاری ل دهۆكێ هاتیە ئاڤاكرن و هەتا نوكە وەكو جهەكێ كەڤنار مای، بەری چەند رۆژان هندەك گۆهۆڕین تێدا هاتنە كرن و نوكە بوویە جهەكێ كلتۆری و ب دەهان وێنەیێن سەرۆك و سیاسەتمەدار و سەرۆك هۆز و ئاغا و ناڤدار و ماقویلێن دهۆكێ و كوردستانێ تێدا هاتینە هلاویستن و ناڤێ وێ كریە (مالا باپیری) و نوكە دبێژنە وی جهی جادەیا گۆمركێن هشك.
ئەحمەد شێخ جەواد، كو دبیتە نەڤیێ شێخ نوری ل دۆر وی جهێ كلتۆری بۆ رۆژنامەیا ئەڤرۆ گۆت: ئەڤە جهە قەسرا (شێخ نوری منەوەر) ناسیار ب (حەجی نوری) بوو، كو دبیتە باپیرێ مە، لەورا من و برایێن خوە هندەك گۆهۆرین تێدا كرن و مە ناڤێ وێ كرە (چایخانا مالا باپیری) مەرەما مە ژڤێ چەندێ نە بوو كارەكێ بازرگانیە، بەلكو ژبۆ هندێ یە دا خەلكەك بهێن ڤی جهێ كەڤنار ب چاڤێن خوە بینن و نوكە بتنێ وەك چایخانە یە، لێ ل دەمەكێ نێزیك دێ تێشتێن كوردەواری ژی لێ هێنە دانان و مەرەما مە ئەوە دەمێ كەسایەتی و ناڤدار و گەنج و دانعەمر و شاندێن بیانی دهێنە ڤێرە ب چاڤێن خوە وێنەیێن وان كەسایەتیان ببینن و بۆ دەمێ بهێت ژی دێ هندەك گۆهۆڕینان ل سەر زێدە كەین.
