قەلەوی ناھیلێت ھندەک ژن دوگیان ببن
ئەڤرۆ نیوز:
تایبەتمەندا نەخۆشیێن ژن وزارۆبوونێ بۆ لاپەری ساخلەمیێ دیارکر کو قەلەویا ژنێ گەلەک مەترسیا ل سەر چێبوونا زارۆی ھەی و گەلەک کارتێکرنێ ل سەر ھێکێن ژنێ دکەت، گەلەک جاران قەلەوی دبیتە ئەگەر ژنێ زارۆ نەبیت، لێ ھەکە ژن یا قەلەو دوگیان ژی بیت ل سێ ھەیڤێن ئێکێ ژ دوگیانیێ و ھەتا ھەر سێ ھەیڤێن دووماھیێ مەترسیەکا مەزن ل سەر ژیانا زارۆی و ژنێ یا ھەی.
د. جنار مستەفا، تایبەتمەندا نەخۆشیێن ژنان و زارۆبوونێ دیارکر کو ژنێن قەلەو گەلەک ب زەحمەت دوگیان دبن و گەلەک جاران ژنێن قەلەو ژبەر قەلەویێ دوگیان نابن، ئەڤە گەلەک مشەیە دناڤ خەلکێ مەدا و گەلەک ژن ژی دێ دو یان سێ زارۆ ھەبن و دێ راوەستن ژ زارۆکبوونێ و گۆت: قەلەوی گەلەک کارتێکرنێ ل ھێکێن ژنێ دکەت کو قاتەکێ ستوور دکەڤیتە سەر ھێکێن ژنێ و ژ دوگیانیێ رادوەستیت و ھەکە دوگیان ژی ببیت ل سێ ھەیڤێن ئێکێ مەترسیا ژبەرچوونا زارۆی یا ھەی و دێ تووشی نەخۆشیا شەکرێ بیت و ھەکە نەخۆشیا شەکرێ بەری دوگیانیێ ھەبیت دێ دگەل دوگیانیێ گەلەک زێدەبیت.
تایبەتمەندا نەخۆشێن ژنان و زارۆکبوونێ ئاشکرا کر کو سێ ھەیڤێن ئێکێ ژ دوگیانیێ ئێشا شەکرێ گەلەک کارتێکرنێ ل کۆما دەمارێن زارۆکی دکەت د زکێ دایکێ دا ئەو زارۆک ژی یێ تەمام نابیت یان ئاڤ دکەڤیتە سەرێ وی یانژی قەباغێ سەرێ وی تێدا نینە یانژی ستوونا پشتا وی یا دروست نابیت ، یانژی دێ نەخۆشیێن دلی بۆ وی زارۆی دروست بن و زێدەباری ھندەک نەخۆشیێن دی بۆ زارۆکی چێدبن و ل سێ ھەیڤێن ئێَکێ دا ژ دوگیانیێ رەنگە زارۆ نەمینیت د زکێ دایکێ دا ژبەر نەخۆشیان.
د. جنار ئاماژە دا وێ چەندێ کو ژنێن قەلەو پێدڤیە بەردەوام سەرا نوشدارێن شەکرێ بدەن، زێدەباری ئەنجامدانا وەرزشێ بۆ ھندێ کونترول ل سەر شەکرا ژنێ بھێتە کرن و ھەکە دوگیان ببیت و پرانیا جارا ژی دەمێ ژن دوگیان دبیت نابیت ژ 13 ھەتا 14 کیلویا زێدەتر بچنە سەر سەنگا وێ یا نورمال بەری دوگیانیێ ھەکە پتر قەلەو بیت ئەو ژن دگەل زارۆێ خوە دێ د مەترسیەکا مەزن دا بن.
ناڤبری زێدەتر گۆت: ھەیڤا چار و پێنج و شەش ژی دێ ھەر زارۆ د مەترسیا ژبەرچوونێ دا بیت و گەلەک کارتێکرن ل گەشەکرنا زارۆکی دھێتە کرن بۆ ژنێ ژی ھەودانێن گولچیسکا و میزەرویێ دروست دبن ل ھەیڤا حەفت و ھەشت و نەە ژ دوگیانیێ، دایکا قەلەو پێدڤیە نەھێلیت ئێشا شەکرێ زێدەببیت، چونکو زارۆکێ وێ یێ مەترسیەکا مەزن دایە.
