كابانیا مالێ
سندس سالح سلێڤانەیی
د ڤان كاودانێن ئالۆز یێن ئابووری دا، ئەركێ كابانیا مالێ گەلەك گرانتر دبیت، ئەو كەسا كو چاڤدێریا مالێ دكەت، پێدڤیە هزرەكا باشتر هەبیت دا كو بارێ سەر هەڤژینێ خوە گران نەكەت، رۆلەكێ گەلەك گرنگ هەیە د رێڤەبرنا مەزاختیێن مالێ دا.
ژ گرنگترین تشتا ئەوە كو كابانیا مالێ پلان و بودجەیەكا دیار دانیت و پێدڤیە بزانیت كا پارەیێ مالێ بۆ چ دێ هێتە مەزاختن و ل كیڤە دێ هێتە سەرفكرن، هەروەسا پێدڤیە جودایێ بكەت دناڤبەرا پێدڤیێن سەرەكی و تشتێن كەمالی دا، تشتێن كو نە گەلەك دپێدڤی بن، باشترە نەهێنە كڕین.
هەروەسا پێدڤیە كابانیا مالێ هەست ب بەرپرسیارەتیێ بكەت دەمێ مەسەلا گۆهۆڕینا كەلوپەلێن ناڤمالێ دهێتە پێش، نە هەر تشتەكێ كەڤن پێدڤیە بهێتە گۆهۆڕین، بەلكو بتبێ ئەو تشتێن كو ب راستی ناچن ئێدی یان خراب بووینە، ئەڤ هزرە دێ هاریكاریا خێزانێ كەت كو پارەیێ خوە بپارێزیت.
ئێك ژ خالێن گرنگ ئەوە كو كابانیا مالێ لیستەیەكا تشتێن پێدڤی دانیت و پێگیریێ پێ بكەت و دەمێ چوو بازاڕی بتنێ وان تشتا بكڕیت یێن كو ل سەر لیستێ هەین، نەكو هەر تشتەكێ چاڤێ وێ ڤێ یكەڤیت بكڕیت، ب ڤی ڕەنگی، كابانیا مالێ دشێت رۆلەكێ باش ببینیت د پاراستنا ئابووریا خێزانێ دا و باری نەكەتە سەر هەڤژینێ خوە، ئەڤە دێ هاریكاریەكا مەزن بیت ژبۆ پێشكەفتنا خێزانێ و دووربوون ژ كێشەیێن ئابووری.
لەورا دڤێ قوناغێ دا گەلەكا گرنگە هەموو كابانیێن مالێ ڤێ رەوشێ ل بەر چاڤ وەربگرن و بارێ هەڤژین یان خێزانا خوە ژی گران نەكەن، هەمان شیرەتا من بۆ كچان ئەوە ب تایبەت ئەوێن هێشتا ژیانا هەڤژینیێ پێك نە ئیناین و ل گەل مالا خوە دژین، فەرە ئەو ژی دڤێ رەوشێ بگەهن و بارێ باب و برایێن خوە ل بەر چاڤ وەربگرن، چنكو پڕانیا وان فەرمانبەرن و مووچەیێ وان گیرۆدبن، لەورا دڤێت ئەو ژی بزاڤێ بكەن ئەو تشتێ گەلەك پێدڤی نەبیت نەكڕن، چنكو ئەم هەموو دزانین بۆ هەر مالەكێ دو تشت پێدڤی نە، یا ئێكێ خوارن و ڤەخوارن كو ئەو گەلەك د پێدڤی نە، چنكو هەكە ئەو دمالێ دا نەبن دێ گەلەك كێماسی هەبن، یا دویێ دبێژنێ تشتێ (كەمالیەت) كو ئەڤە نەگەلەك ژ گرنگانە، بۆ نموونە هەر كچەك یان ژنەك دشێت (گولاڤێ) نەكڕیت، یانژی ئێكا ئەرزان بكڕیت، بەلێ كەس ژمە هەموویان نەشێت بێی خوارن و ڤەخوارن بژیت.
