كابووسا ستراتیژیه‌تا نوو
یا ڕاست ئه‌وه كو ئه‌م بێژین هێدی هێدی خه‌ریكه یاری و سیناریوَێَن شه‌ڕ و سیاسه‌تێ ل ده‌ڤه‌رێ به‌ر ب ئاشكه‌رابوونێ دچن و دووماهی پشكا شانوَگه‌ریا ستراتیژیا نوو یا دهێته پێشكێشكرن و هه‌ر هه‌می كاره‌كته‌رێن یاریێ و ئه‌كته‌رێن سه‌ر ده‌پێ شانوَیێ ب كوَمبارس و دیكوَریست ڤه, ماسكێن خوه‌نه‌په‌نی كرنێ و خوه‌ڤه‌شارتنێ ژێ هێنه لادان و په‌رده ل سه‌ر قوووناغا ئێكێ یا گوهۆرینێن دێ هێته ڤه‌دان و كابووسا ستراتیژیه‌تا نوو یا روَژهه‌ڵاتا ناڤینا نوو دێ دیكتاتۆریا نوو یا بهارا سیاسی ل ده‌ڤه‌رێ به‌ر ب نه‌مان و هه‌ڕفینێ به‌ت. له‌وا ئه‌م دبێژینێ (كابووس) چونكی ئه‌ڤ نه‌خشه و داڕشتنه‌یا نوو نه ب دلێ ئه‌قلیه‌تا كه‌ڤناره و پڕانیا ده‌ستهه‌ڵات و حوكمرانێن ده‌ستكردێن سه‌رده‌مێ شه‌ڕێ جیهانێ دووێ ره‌ت دكه‌ن. ل ده‌ما روودانا تراژیدیایا 11 سێبتێمبه‌را 2001 ێ سه‌روَكێ ئه‌مریكا ب داخوه‌نیه‌كا زه‌ڵال شه‌ڕ و جه‌نگه‌كێ سه‌رتاسه‌ری دژ ب تیروَرێ و رێكخراوا (القاعیده) ڕاگه‌هاند و هێرشێن ئه‌سمانی و زه‌مینی ل هه چار كنارێن دونیایێ ده‌ستپێكر. ئه‌م دكارین ئه‌وێ ڕاگه‌هاندنێ ب ئێكه‌مین روَژ و ئێكه‌مین به‌یانا سه‌ربازیا شه‌ڕێ جیهانیێ سیێ توَماربكه‌ین و هه‌تا نها ژی به‌رده‌وامیا وێ ل سه‌ر چه‌ندین ئاستێن جودا جودا و ل سه‌ر چه‌ندین پانتایی و وه‌ڵاتێن جودا و ل ژێر چه‌ندین ناڤێن جودا یا هه‌ی, بێگومان كوشتنا (ئوسامه بن لادن) وه‌رچه‌رخانه‌ك له‌شكری بوو, هه‌روه‌سا باشترین گڕۆڤه و به‌هانه بۆ ژ بوَ داهێنانا تاكتیكه‌ك سیاسی و له‌شكری یا نوو ب مه‌ره‌ما به‌رده‌وامێدانا شه‌ڕیِ جیهانیێ سیێ, له‌وڕا (ئوَباما) د هه‌وا هه‌لبژارتنێن خوه دا سوَز و به‌ڵێنێن بدووماهی ئانینا شه‌ڕی دا گه‌لێن جیهانێ و گه‌لێ ئه‌مریكی و زوَر ب ئاشكه‌را ڕاگه‌هاند كو پێدڤیه ئه‌م خه‌باتێ دژی تیرَوَرێ و تیرَورستان بكه‌ین نه‌كو شه‌ڕ. ڕامان ژێ ئه‌وه كو فه‌لسه‌فا (شه‌ڕ) ی ب فه‌لسه‌فا (خه‌بات) بهێته گوهۆڕین و ماكینه و داینه‌موَیا شه‌ڕێ جیهانێ ب نێڕینه‌ك دن كارێ خوه بكه‌ت. ل ڤێره دا بۆمه خوه‌یا بوو كو ستراتیژییه‌تا نوو ژ دایك بوو و ڤه‌ڕێژا ستراتیژیا شه‌ڕێ جیهانیێ سیێ یه، ئه‌و ژی هه‌روه‌كی هه‌ردو شه‌ڕێن دن یێن جیهانێ, دێ بیته ئه‌گه‌رێ خوڵقاندن و ڕاگه‌هاندنا چه‌ندین رێكه‌فتن و په‌یماننامه و نه‌خشه و پێكهاته و سنۆر و توخیبێن ده‌وله‌تێن نوو و تازه و هه‌لوه‌شیانا هه‌كه‌لیه‌تا سه‌د ساڵێن بۆری و چوون به‌ر ب ده‌ستپێكا دیروَكه‌كا نوو و هێلانا دیروَكا كه‌ڤن. ڕه‌نگه هاتنا (داعش) و شه‌ڕێ وان و گه‌فێن سه‌رتاسه‌ری و ده‌ستوه‌شاندنا وان ل ڕوَژئاڤا و نه‌خاسمه ئه‌ورۆپا ئێك بیت ژ شاشیێن ستراتیژیا (ئوَباما) ی ل ڕوَژهه‌ڵاتا ناڤین و ب تایبه‌ت ل ئیراقێ, لێ به‌لێ چێدبیت ژ بوَ مه كوردان ده‌رئه‌نجامه‌كا به‌روڤاژی هه‌بیت, چونكی ل دووڤ پیلان و نه‌خشێ داڕشتی پێدڤی بوو (داعش) پشتی كه‌فتنا (مووسل) هێرشان به‌ر ب پایته‌ختێ ئیراقێ ببه‌ن, لێ ژ نشكاڤه هێرشێن خوه به‌ر ب كوردستانا باشۆر و هه‌رێمێ ڤه ئانین، ئه‌ڤ گوهۆرینا ژنشكاڤه جهێ ڕامان و ڤه‌كۆلین و ل سه‌ر ڕاوه‌ستانێ یه! هه‌لبژاتنا هه‌رێما كوردستانێ وه‌كی ئه‌نیه‌ك ژ بوَ (خه‌بات)ێ ل دژی تیرَوَرێ ل جیهانێ بوویه پشكه‌ك گرنگ ژ ستراتیژیا نوو, بوویه كاره‌كته‌ره‌كێ سه‌ره‌كی د كوَنگره و پلاتفوِرمێن جیهانیدا, بوویه هژماره‌كا گران د هه‌ڤكێشه‌ێن شه‌ڕێ جیهانیێ سیێ دا, 1500 كم ئه‌ردێ دیروكیێ خوه زڤڕاندن , چه‌كێن قوڕس و موَدرێن و مه‌شقێن تازه‌ێن سه‌رده‌مانه ژی بوَ سۆپا و له‌شكرێ خوه بده‌ستڤه‌ئانی, سه‌رباری شه‌ڕێ گران مفای ژ سامانێن سروشتی و پتڕوَلا خوه ل دووڤ پیڤه‌رێن ستانده‌رێن جیهانێ وه‌ردگریت و خودانێ بازاڕێ جیهانیێ خوه‌یه. ڕاستی ژبوَ نه‌حه‌ز و نه‌یاراێن كوردان ستراتیژییه‌تا نوو (كابووس)ـه‌كه و بێهنا وان ته‌نگ كریه. ئه‌ز نه‌یێ شاشم هه‌كه بێژم ئه‌م كورد چ جاران پێدڤی ب شه‌ڕی نه‌بووینه لێ به‌لێ هه‌رده‌م و گاڤ شه‌ڕ پێدڤی مه بوویه.
