كابینا ههشتێ د تێروانینهكا سیاسى دا
رهمهزان نسرهددین كێڤلى
سهرۆكێ كۆمهلا ئهكادیمیێن زانستێن سیاسى
پێكئینانا كابینا ههشتێ ل دهمێ خوه بهرههمێ شهش مههێن دانوستاندنێ بوویه د ناڤبهرا لایهنێن سیاسى دا ل ههرێما كوردستانێ، چونكو بۆ جارا ئێكێ بوویه حوكمهتهك بنكهفراوان بهێته پێكئینان و دیسا ئێكهم سهربۆرا پێكڤه كاركرنێ بوویه د ناڤبهرا دو حزبێن بهردهوام ل دهستههلاتێ و ل گهل هژمارهكا حزبێن دى كو ل بهرهیێ ئوپوزسیۆنێ دا بووینه سهرهراى هندێ كو ل دهمێ خوهدا ژى مه رهخنه ل سهر ئاڤاكرنا حوكمهتا بنكه فراوان ههبوویه چونكو ههر حزبهكا سیاسى ل گۆر بهرژوهندیا خوهیا حزبى كار دكر و ئهو خالێن دبنه بنهما بۆ پێكڤهكاركرنێ یێن ههڤپشك د ناڤبهرا ئهڤا لایهنێن سیاسى دا زۆر كێم بووینه، نهخاسمه ژ كێم ئهزمۆنیا ئوپوزسیۆنێ، چونكو ئاراستا حوكمرانیا ئهڤان لایهن ل سهر دو ئاراستهیان هاتبوو پارڤهكرن ئاراستهك ل دهستههلاتا یاسادانانێ دا كو ل پهرلهمانێ ههمان شێوازێ ئوپوزسیۆنێ بخوهڤه دیت ئهڤه ل دهمهكێ نهیا گونجایێ بوو، ل سهر پشكداریا وان د حوكمهتێ دا ئاراستا دى پشكهكێ كارا بووینه ژ حوكمهتێ د تێگههێ سیاسهتێ دا تو نهشێ ل ئێك دهم دا ل ئێك جه دا دو سیاسهتێن ژئێكجودا پهیرهو بكهیێ و دێ تووشى نیفاقا سیاسى بى ل گهل رایا گشتى و ئهندام و لایهنگهرێن خوه.
سهر ئهنجامێن وێ كابینا ههشتێ كهفته ل بن چهند پرسیارێن ستراتیژى ڤه تایبهت ژ روویێ ههلسهنگاندنهك سیاسى دا ئهگهر پرسیارهك بهێته ئاراستهكرن كابینا ههشتێ شیایه بهرنامێ خوهیێ كارى جێ بهجێ بكهت؟ گومان تێدا نینه، بهرسف نهخێر، چونكو ل سهر گهلهك ئاستان مهزنترین قهیران ل ناڤخوهیا كوردستانێ دورست بووینه و یا ژ ههمووان كاریگهرتر قهیرانا سیاسى و نهبوونا باوهریێ بوویه د ناڤبهرا حزبێن پشكدار د كابینا ههشتێ دا و ب راستى ژى ئهزمۆنهك خراب نیشا خهلكى دان ئهڤه بوو ئهگهرێ هندێ ژینگهها سیاسى ل ناڤخوهیا كوردستانێ تووشى مهزنترین خالێن لاواز ببن و ئهوا پێدڤى ژلایێ حوكمهتێ ڤه نههاتیهكرن بهرامبهرى زۆر بابهتان، ژ وانا داریشتنا سیاسهتا ئابوورى یا گونجایێ و ههبوونا دادپهوهریا جڤاكى و ئهنجامدانا چاكسازیان و رهوشا خرابا ئابوورى یا تهخا ههژار و كێم دهرامهت و تایبهت مووچهخوران ئهڤه پشكهكا ناڤخوهیێ ههلسهنگاندنێ یه بۆ كابینا ههشتێ و نهخاسمه ئهو ئاریشێن ژلایێ حزبێن سیاسى ڤه بۆ ڤێ كابینێ هاتینه دورستكرن، لێ ئهگهر پرسیارهك دى لۆژیكى بهێتهكرن ل دهڤهرهكا تژى قهیران و بهرهلایێ و گهڤ و مهترسیێن تیرۆرێ ل سهر و ل وهلاتهكێ زۆربهیێ ئاخا وێ هاتبیته داگیركرن و پهیوهندیێن نێڤدهولهتى كهتبنه د ناكۆكیهكا بهردهوام دا و ئابلۆقێن ناڤخوه دهڤهر ل سهر ههرێمهكا بچووك وهكو ههرێما كوردستانێ ههبن ئهرێ دهربازبوون ژ ئهڤان ههمى قهیران و دهردهسهریان نه كارهكێ ئێكجار مهزنه ب دیتنا من ئهگهر ژ ڤێ ئالیێ ڤه ئهم ههلسهنگاندنهك وژدانى بۆ كابینا ههشتێ بكهن، ئێك بوویه ژ كابینێن سهركهفتى و تایبهت ئهڤ چهنده ڤهدگهریت بۆ خودێ سهرۆك وهزیرێن حوكمهتا ههرێمێ كو شیایێ ب دبلۆماسیانه ههى ئابلۆقێن سیاسى نههێلێت و ب ئیدارهك باش بۆ پتریا قهیرانان بكهت و سهرئهنجامێن وێ قهوارێ ههرێما كوردستانێ ژ مهترسیا ژناڤچوونێ بهر ب بهێزبوونا ڤه بچیت و قووناغهك نوو دهست پێ بكهت، لهورا ب دیتنا من هێشتا رهوشا ههرێمایهتى و ناڤخوهیا عیراقێ نهیا سروشتى یه ب دههان كێشه و گرفتێن سیاسى و ئهمنى ههنه، لهورا ههرێما كوردستانێ پێدڤى ب سهرۆك وهزیر و حوكمهتهكێ ههیه خواندن بۆ گشت وارهكێ ژیانا سیاسى و ئابوورى ههبیت تاكو ههرێمێ ل ڤێ قووناغێ ژى ژ مهترسیان دهرباز بكهت.
