كابینەیا نەهێ ١٦٣ پرۆژە ل شێخان ئەنجام داینە
دهۆك، دلۆڤان ئاكرەیی
دەڤەردارێ شێخان دیار كر، حوكمەتا هەرێما كوردستانێ ب كۆژمێ پتر ژ 260 ملیار دیناران خزمەتا شێخان كریە و گرنگیەكا زۆر دایە دەڤەرا شێخان و د ماوێ كابینەیا نەهێ دا 163 پرۆژە ب كۆژمێ زێدەتر ژ 240 ملیار دیناران ئەنجام داینە و پشكەك ژ وان پرۆژەیان ستراتیژی نە.
سەردار یەحیا دەڤەردارێ شێخان بۆ رۆژنامەیا (ئەڤرۆ) گۆت: ب بڕیارا سەرۆكێ حوكمەتا هەرێما كوردستانێ، پرۆژەیێن خزمەتگوزاری ل سنورێ قەزا شێخان بەردەوامن و گوهۆرینێن مەزن ل شێخان دروست بووینە، وەكۆ چێكرنا پرۆژێ دوسایدێ شێخان بۆ لالش كو باشترین پرۆژەیە و چ حوكمەتەكێ نەشیایە ئەنجام بدەت، لێ د ڤێ كابینەیێ دا هاتە ئەنجام دان، ب گشتی د كابینا نەهێ دا، ب كۆژمێ زێدەتر ژ 260 ملیار دیناران پرۆژە ل شێخان هاتینە بجهینان و كار ل سەر چەندین پرۆژەیان ژی یێ بەردەوامە.
زێدەتر دبێژیت: ئێك ژ وان پرۆژەیان رێیا باعدرێ بۆ دهۆك كۆ رێژا كاركرنێ ل سەر ڤی پرۆژەی گەهشتیە ٧٠٪ كۆ تێدا چەندین ئەندەرپاس و ئۆڤەرپاس تێدانە، هەروەسا ڕێیا نەهدار بۆ زالگەها باعەدرێ ب كۆژمێ 10 ملیار دیناران دهێتە نووژەنكرن و قێركرن و چەندین پرۆژەیێن دی ژی یێن وەكی بەنداڤا خەنس، قێركرنا ڕێیێن ناڤخۆیی ل شێخان و ناحیان، دروستكرنا یاریگەهێن وەرزشی، بنگەهێن ساخلەمیێ، كاركرن ل سەر وان پرۆژەیان د بەردەوامن، ب گشتی ١٦٣ پرۆژە د ماوێ چوار سالین بۆری دا د كابینا نەهێ دا ل شێخان هاتینە بجهینان و پشكەك ژ وان نها د كاریدانە.
سەردار شێخ یەحیا سوپاسیا سەرۆكێ حكومەتێ كر و گۆت: حوكمەتا هەرێما كوردستانێ خزمەتەكا زۆر یا شێخان كریە، سەرەڕای هندێ كو پشكەك ژ شێخان سەر ب موسل ڤەیە ژ ئەگەرێ ڤێ خزمەتكرنێ د بەرفرەهبوونەكا بەردەوام دایە.
