كاراتَێیا دهۆكێ رێزا دویێ ب ده‌ستڤه ئینا
ئه‌ڤرۆ،
ب جوداهیا دو خالان تیما كاراتێیا یانا دهۆكێ رێزا دویێ یا قاره‌مانیا ئیراقێ بۆ ئاستێ پێشكه‌فتیان ب ده‌ستڤه ئینانا پشتی 40 خال كۆمكرین د هه‌ڤڕكیێن قاره‌مانیێ دا ئه‌وا ل ئه‌ینیا بوری ب پشكداریا زێده‌تری 120 یاریزانا ژ 27 یانێن هه‌رێما كوردستانێ و ده‌ڤه‌را باكۆرێ ئیراقێ بۆ هه‌ردو سیسته‌مێن كاتا و كۆمێته ل باژێرێ سلێمانیێ هاتیه ئه‌نجامدان، یانا خۆرمال ب 42 خالان ب ناسناڤێ قاره‌مانیێ هاته خه‌لاتكرن و یانا پێشمه‌رگه‌یا سلێمانیێ ب 28 خالان رێزا سێیێ هات.
د داخویانیه‌كێدا گه‌یلان باپیر سه‌رۆكێ ئێكه‌تیا كاراتێیا پارێزگه‌هێ و سه‌رپه‌رشتێ تیما دهۆكێ بۆ رۆژناما ئه‌ڤرۆ گوت: ئه‌نجامێن تاك یێن یاریزانێن دهۆكێ ب ڤی ره‌نگی بوون، بۆ كێشا -55كگم سرۆد سلێمان رێزا دویێ، بۆ كێشا -67كگم رویار شڤان رێزا دویێ، بۆ كێشا -55 محه‌مه‌د یوسف رێزا سێیێ هات، بۆ كێشا +83 هه‌ردو یاریزان هه‌وراز عه‌بدوللا و ناسیار نۆژدار رێزێن سێیێ ب ده‌ستڤه ئینان، بۆ كێشا -60 ئارام حه‌سه‌ن رێزا شه‌شێ هات، ژلایێ خوه‌ڤه یاریزانێن سه‌ر ئاستێ كچان و كوڕان بۆ یانا سه‌نحاریب ب تنێ دو ئه‌نجامێن تاك هه‌بوون ئه‌وژی یێ كوڕان هۆنه‌ر جه‌بار بۆ كێشا -60 رێزا دویێ و یاریزانا كچ رۆزان عادل ره‌حمان بۆ كێشا -55 رێزا سێیێ هات.
ژلایێ خوه‌ڤه یوسف ره‌شید راهێنه‌رێ تیما یانا دهۆكێ گوت: ئه‌ڤ قاره‌مانیه دهاته هژمارتن ب هێزترین هه‌ڤڕكیێن وه‌رزێ ئه‌ڤ ساله‌دا و پشكداریه‌كا زێده و هه‌ڤڕكیه‌كا دژوار د هاته كرن، یاریزانێن مه ئاسته‌كێ مه‌زن نیشان دا و شیان شه‌ش ئه‌نجامێن باش ب ده‌ستخوه‌ڤه بینن كو ببنه رێك بۆ پلێتا ده‌ربازبوونێ به‌ره ب یاریێن دووماهیا قاره‌مانیێ وه‌ربگرن ئه‌وا كو دێ هه‌ڤڕكیێ ل گه‌ل یاریزانێن ده‌ربازبوویی ژ باشۆر و ناڤه‌راستا ئیراقێ كه‌ن كو بڕیاره دێ ل باژێرێ به‌غدا هێنه ئه‌نجامدان ژبۆ ژێگرتنا پێكهاتیێ هه‌لبژارتیێ ئیراقێ بۆ قاره‌مانیا نێڤده‌وله‌تی یا فه‌رمی كو بڕیاره هه‌ڤڕكیێن وێ ل چڕیا ئێكێ یا بهێت باژێرێ دوبه‌ی یێ وه‌لاتێ ئیماراتێ مێڤانداریا وێ بكه‌ت، یا گرنگ پێنگاڤا ئێكێ جهێ ده‌ستخووشیێ بوو ب هیڤی نه لایه‌نێن په‌یوه‌ندیدار پشته‌ڤانیا ڤان یاریزانا بكه‌ن بۆ هندێ به‌ره ب ناسناڤی ژی بچن و پشكداری قاره‌مانیا عه‌ره‌بی و نێڤده‌وله‌تی بكه‌ن.
