كاراتێیا دهۆكێ دێ به‌ره ب بۆلگاریا چیت
ئه‌ڤرۆ،
چاڤه‌ڕێ دهێته كرن سوبه‌هی تیما كاراتێ یا یانا دهۆك و سه‌نحاریب نوونه‌راتیا پارێزگه‌ها دهۆكێ د قاره‌مانیا ئیراقێ بۆ كۆما ده‌ڤه‌را هه‌رێما كوردستانێ و باكورێ ئیراقێ بكه‌ن ئه‌وا دێ هه‌ڤڕكیێن وێ بۆ سیسته‌مێ كۆمێته و كاتا ل باژێرێ سلێمانیێ هێنه ئهنجامدان و دووڤدا كاراتیێا دهۆكێ ئێكسه‌ر دێ به‌ره ب وه‌لاتێ بۆلگاریا رێكه‌ڤیت ژبۆ پشكداریێ د قاره‌مانیا نێڤده‌وله‌تی یا ڤه‌كری دا.
گه‌یلان باپیر سه‌رۆكێ ئێكه‌تیا كاراتێیا پارێزگه‌هێ و سه‌رپه‌رشتێ تیما دهۆكێ بۆ رۆژناما ئه‌ڤرۆ گوت: بۆ ماوێ دو رۆژان هه‌ردو یانێن دهۆك و سه‌نحاریب سوبه‌هی دێ كه‌ڤنه د هه‌ڤڕكیێن قاره‌مانیا ئیراقێ یا قۆناغا ئێكێ بۆ یانێن ده‌ڤه‌را هه‌رێما كوردستانێ و باكورێ ئیراقێ دا بۆ ئاستێ پێشكه‌فتیان یێن هه‌ڤڕكیێن كاتا و كۆمێته، دهۆك ب پشكداریا 12 یاریزانا بۆ شه‌ش كێشێن جودا هاتینه ده‌ستنیشانكرن كو هه‌ر كێشه‌ك دو یاریزان دێ هه‌ڤڕكیێ كه‌ن، یانا سه‌نحاریب ل سه‌ر ئاستێ كوڕان و كچان ب هه‌مان رێژه دێ هه‌ڤڕكیێ كه‌ن پێخه‌مه‌ت قۆناغا دویێ و ده‌ربازبوون بۆ دووماهیا قاره‌مانیێ ئه‌وا دێ ل باژێرێ به‌غدا هێنه ئهنجامدان ژبۆ ژێگرتنا پێكهاتیێ هه‌لبژارتیێ ئیراقێ بۆ قاره‌مانیا نێڤده‌وله‌تی یا فه‌رمی كو بڕیاره هه‌ڤڕكیێن وێ ل چڕیا ئێكێ یا بهێت باژێرێ دوبه‌ی یێ وه‌لاتێ ئیماراتێ مێڤانداریا وێ بكه‌ت.
ژلایه‌كێ دووڤه ناڤهاتی دیاركر كو پشتی ب دووماهی هاتنا قۆناغا ئێكێ یا قاره‌مانیا ئیراقێ دهێته چاڤه‌رێكرن تیما پێشكه‌فتیێن یانا دهۆك ل شه‌مبیا بهێت به‌ره ب وه‌لاتێ بۆلگاریا برێڤه‌كه‌ڤیت ئه‌گه‌ر چو ئاسته‌نگ نه كه‌ڤنه درێكا وان دا ژبۆ پشكدایێ د قاره‌مانیا ڤه‌كری یا نێڤده‌وله‌تی ئه‌وا سالانه ژلایێ ئێكه‌تیا بۆلگاری و ده‌وله‌تی بۆ پرانیا یانه و یاریزانێن سه‌ر ئاستێ جیهانێ رێكدئێخیت، هه‌رچه‌نده هه‌موو پێدڤیێن یاریزانا و داراییا وێ سه‌ر كیستێ شاندێ تیمێ ب خوه دگریت لێ گه‌شبینم دێ ب ئه‌نجامێن دلخوه‌شكه‌ر ڤه‌گه‌رێن.
