كارتێن بایۆمەتری یێن دەنگدانێ ب رێژەیا 96% ل دهۆكێ هاتینە بەلاڤكرن
ئەڤرۆ
بەرپرسێ ئوفیسا دهۆك یا كۆمسیۆنا بلندا سەربخوە یا هەلبژارتنان دیار كر، 27 هزار كارتێن بایۆمەتری ل سەر دەنگدەران دهێنە بەلاڤكرن و داخوازێ ژ دەنگدەران دكەین بچن كارتێن خوە یێن بایۆمەتری وەربگرن.
خالد عەباس، بەرپرسێ ئوفیسا دهۆك یا كۆمسیۆنا بلندا سەربخوە یا هەلبژارتنان راگەهاند: «نوكە ل پارێزگەها دهۆكێ دەست ب تۆماركرنا دەنگدەرێن ژ دایكبوویێن سالێن 2004 و 2005ێ هاتیە كرن، وان ژی ماف هەیە بۆ هەلبژارتنێن بهێن دەنگێ خوە بدەن، داخوازێ ژ خەلكێ خوە دكەین قەستا بنگەهان بكەن بۆ ئەنجامدانا پرۆسەیا تۆمارا بایۆمەتری، نوكە ل سەرانسەری پارێزگەها دهۆكێ ل 41 بنگەهان كارتێن بایۆمەتری دهێنە بەلاڤكرن و هەتا نوكە 27 هزار كارتێن بایۆمەتری ل دهۆكێ ماینە و نەهاتینە بەلاڤكرن».
گۆتژی: «ل دهۆكێ رێژا بەلاڤكرنا كارتێن بایۆمەتری گەهشتیە 96% و بەردەوام كارتێن بایۆمەتری ل سەر دەنگدەران دهێنە بەلاڤكرن، ئەم داخوازێ ژ خەلكێ دهۆكێ دكەین سەرەدانا بنگەهان بكەن بۆ ئەنجامدانا پرۆسیەیا تۆمارا بایۆمەتری، دیسا هەموو دەنگدەرێن ناڤێن خوە هەتا رۆژا 1/5/2021 تۆماركرین دشێن بچن كارتێن خوە وەربگرن».
