كاركرنا ژنان پێدڤیەكا گرنگە
دلڤین رەشید
ساهیرا عیدۆ، د دیدارەكێ دا بۆ رۆژنامەیا ئەڤرۆ دیاركر كو ئەو خەلكا دەڤەرا شنگالێ یە و ئەڤە نێزیكی دو سالانە ئەو هەڤژینێ خۆ كارێ دروارێ دكەن و ئەڤ كار بوویە ژێدەرێ ژیانا وان یا رۆژانە و دبێژیت: كاركرنا ژنان ژ دەرڤە دبیتە ئامرازەكی گرنگ ژ بۆ گەشەپێدان و پێشكەفتنا جڤاكی.
ناڤهاتیێ گۆت: راستە ل سەر دەمێ بەرێ ژنان بەس كارێ مالێ دكرن، وەك ب خودانكرنا زارۆكان و ب رێڤەبرنا كارو بارێن مالێ، بەلێ دڤان سالێن دووماهیێ دا دەرگەهێن كاری ل دەرڤە ژ بۆ ژنان زێدە بووینە و نوكە ژن دشێن دگەلەك بۆاراندا كار بكەن و رۆلەكی باش ببینن و دقوناغا نوكە دا كاركرنا ژنان پێدڤیەكا گرنگە كو ژن ژی بشێت هاریكار و پشتەڤانا خێزانا خۆ بیت، پشتەڤانیا ژنان و دابینكرنا دەرفەتێن باش ژلایێ خێزان و جهێن پەیوەندی دارڤە دبیتە ئەگەر كو جڤاكەكی باشتر و دادپەروەرتر دوست بكەین.
