كارگێریا یانا دهۆك ب ستاڤه‌كێ نوو ده‌ست ب كاربوون
ئه‌ڤرۆ،
ل شه‌مبیا بوری ده‌سته‌كا نوو یا كارگێریا یانا دهۆك یا وه‌رزشی بۆ چار سالێن دی هاته هه‌لبژارتن و بۆ جارا ئێكێ پرانیا وان گه‌نج و خودان شیانن كو ژلایێ ده‌سته‌كا گشتی یا یانێ ڤه هاتبوونه هه‌لبژارتن ئه‌وا 221 كه‌سان پشكداری پروسه‌یا ده‌نگدانێ كری و ژلایێ رێڤه‌به‌ریا گشتی یا وه‌رزشی ل هه‌رێما كوردستانێ ڤه هاتبوو برێڤه‌برن، 16 كه‌سان هه‌ڤڕكی بۆ كارگێریا نوو دكرن ژوانا هه‌شت كه‌س هاتنه هه‌لبژارتن پشتی ده‌نگێن پێدڤی ب ده‌ستخوه‌ڤه ئیناین و بڤی ره‌نگی بوون.
عبدوللا جه‌لال 174 ده‌نگ، خالد موشیر 168 ده‌نگ، جاسم محه‌مه‌د حاجی 167 ده‌نگ، رێگر سلێمان 155 ده‌نگ، خالد محه‌مه‌د 125 ده‌نگ، یوسف ره‌شید 125 ده‌نگ، هشیار فه‌ریق 123 ده‌نگ، ملله‌ت جه‌مال 111 ده‌نگ.
د داخویانیه‌كێدا عه‌بدوللا جه‌لال سه‌رۆكێ نوو یێ یانا دهۆك بۆ رۆژناما ئه‌ڤرۆ گوت: سۆپاسیا ده‌سته‌كا گشتی یا یانێ دكه‌ین كو باوه‌ری دایه مه بۆ چار سالێن بهێت یێن كارگێریێ، پێخووشحالین كو ئه‌م ده‌سته‌كا نوو ب گه‌نج و شاره‌زایێن د بوارێ وه‌رزشێ دا هاتینه هه‌لبژارتن بۆ خزمه‌تا یانا دایك، یا گرنگ بوو مه ئه‌م پووته‌دان و پشته‌ڤانیا هه‌موو یاریێن خوه یێن وه‌رزشی بكه‌ین لدووڤ شیانێن به‌رده‌ست، پێنه‌ڤێت دێ بزاڤێن مه ڤه‌گه‌ڕاندنا ناڤێ یانا دهۆكێ بیت ل سه‌ر ئاستێ كوردستانێ و ئیراقێ و ده‌رڤه دا، ئه‌م جه‌ماوه‌رێ خوه گه‌شبین دكه‌ین كو دێ كارێ ب رژدی و خه‌مخوری بۆ یانا خوه كه‌ین.
بۆ زانین دوهی كارگێریا یانێ كۆمبوونا خوه یا ئێكێ بۆ ده‌ستنیشانكرنا پۆستێن كارگێرێ ئه‌نجامدان و بڤی ره‌نگی بوون، عه‌بدوللا جه‌لال سه‌رۆك، یوسف ره‌شید جێگرێ سه‌رۆكی، جاسم حاجی سكرتێر، رێگر سلێمان، خالد موشیر، هوشیار فه‌ریق، خالد محه‌مه‌د و ملله‌ت جه‌مال وه‌كو ئه‌ندامێن كارگێری.
