كارگەها چیمەنتۆیا دابین دەلیڤەیێن كاری بۆ هزار و 200 كەسان پەیداكرینە
سەرۆكێ دەستەیا وەبەرهێنانێ ل هەرێما كوردستانێ دیار كر، كارگەها چیمەنتۆیا دابین گرنگییەكا زۆر بۆ ئابۆرێ هەرێما كوردستانێ و داهاتێ وێ هەیە، بەرهەمێ وێ یێ زۆرە و بۆ هەرێما كوردستانێ و عێراقێ و وەلاتێن دیتر ژی دێ هێتە هنارتن.
د. محەمەد شوكری، زێدەتر بۆ رۆژناما ئەڤرۆ دبێژیت: كارگەها چیمەنتۆیا دابین ژ لایێ سەرۆكێ حكومەتا هەرێما كوردستانێ هاتییە ڤەكرن، بۆ هەرێما كوردستانێ و ئیراقێ ژی زۆرا گرنگە، ئێكە ژ كارگەهێن گرنگێن وەبەرهێنانێ ل هەرێما كوردستانێ و عێراقێ، بەرهەمێ ناڤخۆیی یە و پێدڤیێن دەستپێكی یێن وێ كارگەهێ ژی د خۆمالینە، سەرمایێ وی پڕۆژەیی ٢٨٠ ملیۆن دۆلارن و یێ هەڤپشكە ل گەل وەبەرهێنەرێن بیانی، بەرهەمێ رۆژانە یێ وێ كارگەهێ ٨ هزار تەنێن چیمەنتۆیی نە، بەرهەمێ سالانە دو ملیۆن و ١٠٠ هزار تەنن، هزار و ٢٠٠ كەس راستەوخۆ كاری تێدا دكەن، ب هزاران كەس ژی نە راستەوخۆ مفایی ژێ وەردگرن، بۆ هەرێما كوردستانێ و عێراقێ دێ چیمەنتۆیی دابین كەت.
سەرۆكێ دەستەیا وەبەرهێنانێ گۆت ژی: وێ كارگەهێ بۆ ژێرخانا ئابۆرییا هەرێما كوردستانێ و داهاتێ وێ و مفایێ گشتی و چەندین وارێن دیتر، گەلەك گرنگیا خۆ هەیە.
